Փաշինյանին ենթակա ՊՊԾ-ում ծառայողները 8.6 միլիոն դրամի չափով լրավճար կստանան
Կառավարությունը հերթական անգամ չզեկուցվող հարցով ավելացրել է ուժային կառույցներում աշխատող և պաշտոնյաների անվտանգությունն ապահովող ծառայողների համար ֆինանսական հատկացումների չափը. այս անգամ խոսքը վերաբերում է Պետական պահպանության ծառայության զինվորական ծառայողներին. նրանց համար կսահմանվի լրավճար, ինչը մինչև հիմա չի եղել։
Նշենք, որ այս փոփոխությունը կառաջացնի շուրջ 8.6 մլն դրամ գումարի չպլանավորված լրացուցիչ ծախս բյուջեից։
Ուշագրավ է, որ Արմեն Աբազյանի ղեկավարած կառույցում առաջարկել են ՊՊԾ-ի զինվորական ծառայողների համար նախատեսել լրավճար, սակայն չեն ներկայացրել դրա համար անհրաժեշտ հիմնավորումները։
ՊՊԾ զինվորական ծառայողների համար լրավճարներ սահմանելու նախագծի վերաբերյալ առարկություն է ներկայացրել Ֆինանսների նախարարությունը, ըստ որի, նախագծին կից հիմնավորման մեջ բացակայում են լրավճարներ սահմանելու նախաձեռնությամբ հանդես գալու համար հիմք դարձած վերլուծությունները և հիմնավորումները:
Ավելին՝ ներկայացված չէ դա ընդունելու անհրաժեշտությունը հիմնավորող որևէ փաստարկ, ինչի արդյունքում հնարավոր չէ լիարժեք գնահատել նախագծով առաջարկվող կարգավորումների անհրաժեշտությունը և նպատակադրումը:
Չնայած Ֆինանսների նախարարության առարկությանը, նախագիծն ընդունվել է և 8.6 միլիոն դրամով բյուջեն ծանրաբեռնվել է պաշտոնյաների անվտանգությամբ զբաղվող ՊՊԾ ծառայողների համար։
Հիշեցնենք, որ անցյալ տարի նոյեմբերի 24-ին Կառավարության նիստի օրակարգում ընդգրկված, ինչպես միշտ, չզեկուցվող հարցերից մեկով ընդունվեց Պետական պահպանության ծառայությունը Ազգային անվտանգության ծառայությունից առանձնացնելու և Նիկոլ Փաշինյանի ենթակայության տակ որպես առանձին մարմին դարձնելու նախագիծը։
Իսկ Ազգային ժողովում նախագիծը ներկայացնելիս անվտանգության խորհրդի քարտուղար Արմեն Գրիգորյանը՝ ՊՊԾ-ն ուղիղ Փաշինյանի ենթակայության տակ դնելու անհրաժեշտությունը պատճառաբանեց, թե անվտանգության ապահովման կարողությունները բարձրացնելու նպատակով է արվում և հատուկ ուշադրություն է դարձվում անվտանգության մարմինների աշխատակիցների աշխատավարձերը մինչև 100 տոկոս բարձրացնելու վրա:
