«Չենք կարող ՀՀ-ն դնել զոհասեղանի վրա, իսկ աշխարհում չկա երկիր, որը ԼՂ-ն չճանաչի որպես Ադրբեջանի մաս». Փաշինյան
Այսօր հրավիրած ասուլիսում Նիկոլ Փաշինյանն անդրադարձավ ՌԴ ԱԳ նախարար Լավրովի հայտարարությանը:
Լրագրողի դիտարկմանը, թե Պրահայում հայտարարության մեջ հղում անելով Ալմա Աթայի հռչակարգին՝ Լավրովի մեկնաբանությամբ՝ Փաշինյանն ընդունել է Արցախը Ադրբեջանի կազմում, և հարցին՝ արդյո՞ք Փաշինյանը համաձայնություն տվել է, որ Արցախը պետք է լինի Ադրբեջանի կազմում՝ խաղաղության ինչ-որ պայմանագրով, Նիկոլ Փաշինյանը պատասխանեց․ «Այնտեղ կա պայմանավորվածության արձանագրում, որ Հայաստանը և Ադրբեջանը միմյանց տարածքային ամբողջականությունը ճանաչում են 1991 թվականի Ալմա Աթայի հռչակագրի հիման վրա։ Բայց մեր մտահոգությունն այն է, որ Ադրբեջանի նախագահը վերջին շրջանում անընդհատ ասում է, որ ՀՀ-ն ճանաչել է Ադրբեջանի տարածքային ամբողջականությունը, ենթադրում եմ՝ հղում անելով Պրահայի փաստաթղթին, բայց չի ասում, որ Ադրբեջանն էլ ճանաչել է Հայաստանի տարածքային ամբողջականությունը։ Այստեղ կարևոր է նախ այդ հարցում պարզաբանում մտցնել՝ Ադրբեջանը ճանաչո՞ւմ է ՀՀ տարածքային ամբողջականությունը. եթե այո, ՀՀ-ն էլ ճանաչում է Ադրբեջանի տարածքային ամբողջականությունը»:
Նա հավելեց, որ մնացյալ հատվածների վերաբերյալ՝ Ղարաբաղի հարցի կարգավորման բանաձևերի մասին, խոսել է հրապարակային ելույթներում։
«Մենք պետք է մի հարցում կողմնորոշվենք՝ արդյո՞ք մենք որոշում ենք, որ միջազգային հանրության դեմ կռիվ ենք տալիս. այսինքն՝ պատերազմ ենք հայտարարում միջազգային հանրությանը։ Մենք այսօր տեսնում ենք՝ աշխարհում ինչ է կատարվում, և նաև Ուկրաինայի իրադարձությունների տիրույթում շատ մեծ պայքար է գնում նոր աշխարհակարգի վերաբերյալ, և այդ նոր աշխարհակարգում մենք չենք կարող ՀՀ-ն դնել զոհասեղանի վրա։
Աշխարհում չկա ու չի եղել մի երկիր, որ Լեռնային Ղարաբաղը չճանաչի որպես Ադրբեջանի մաս։ Եվ մենք ունենք ընտրություն՝ դասավորվել միջազգային զարգացումների տրամաբանությա՞ն մեջ, թե՞ հակառակ այդ տրամաբանության»,- հավելեց Փաշինյանը:
