«Ուղիղ մեկ տարի առաջ Ադրբեջանն անօրինականորեն և հայկական կողմի թողտվությամբ փակեց Կապան-Ճակատեն ճանապարհը». Ալվինա Աղաբաբյան
Ռազմավարական հետազոտությունների կենտրոնի ղեկավար, ԵՊՀ դասախոս Ալվինա Աղաբաբյանը ֆեյսբուքյան իր էջում գրում է. «Ուղիղ մեկ տարի առաջ նոյեմբերի 14-ին Հայաստանի մի շարք համայնքներում, այդ թվում՝ Կապանում ՏԻՄ ընտրություններ էին։
Նույն օրը՝ ուղիղ կեսգիշերին, Ադրբեջանն անօրինականորեն և հայկական կողմի թողտվությամբ փակեց Կապան-Ճակատեն ճանապարհը՝ Կապանից կտրելով Ճակատեն, Շիկահող, Սրաշեն, Ներքին Հանդ, Ծավ ու Շիշկերտ գյուղերը։
Ադրբեջանական զինված ծառայողների կողմից Կապան-Ճակատեն հիմնական ճանապարհն անօրինական արգելափակելուց ուղիղ մեկ տարի անց Հայաստանի “Ճանապարհային դեպարտամենտ” հիմնադրամը հաղորդում է, որ ավարտվել է “Մ-17 /Մ-2/ (Կապան)-Ծավ- /Մ-2/ ավտոճանապարհի Կապան-Ճակատեն շրջանցիկ հատվածի կառուցումը”՝
“թյուրիմացաբար” Կապան-Ճակատեն ՄԻԱԿ ճանապարհ ասելու փոխարեն կիրառելով “Կապան-Ճակատեն շրջանցիկ հատված” ձևակերպումը, որն իրականությանը չի համապատասխանում, քանի որ Կապանից Ճակատեն այս ճանապարհը ոչ թե շրջանցիկ է կամ այլընտրանքային, այլ հիմնական ճանապարհը թշնամուն հանձնելուց հետո ՄԻԱԿ ճանապարհն է,
“մոռանալով” նշել, որ Կապան-Ճակատեն այս ճանապարհը կառուցվել է այնպես, որ գտնվում է ադրբեջանական զինված ծառայողների ուղիղ նշանառության և վերահսկողության տակ, և թշնամին կարող է ցանկացած պահին թիրախավորել այդ ճանապարհով անցնող մեր մեքենաները կամ փակել ճանապարհը, ինչպես որ դա արեց ընդամենը 2 ամիս առաջ՝ սեպտեմբերի 13-14-ի հարձակման օրերին, երբ կրակի տակ պահելով ճանապարհը՝ թույլ չէր տալիս նրանով մեր երթևեկը և թիրախավորում էր մեր մեքենաները, այդ թվում՝ շտապօգնության»։
