ԱՄՆ-ն և ՆԱՏՕ-ն ցանկանում են ռազմականացնել Ասիա-Խաղաղօվկիանոսյան տարածաշրջանը. Լավրով
Ռուսաստանի ԱԳ նախարար Սերգեյ Լավրովը ելույթ է ունեցել Կամբոջայի մայրաքաղաք Պնոմպենում կայացած Արևելյան Ասիայի գագաթնաժողովում։ Գագաթնաժողովից հետո նա զրուցել է լրագրողների հետ։
ԱԳՆ ղեկավարը պարզաբանել է, որ գագաթնաժողովի արդյունքներով հնարավոր չի եղել համատեղ հայտարարություն ընդունել։ Պատճառը ԱՄՆ պատվիրակության դիրքորոշումն էր, որը պնդում էր «բացարձակապես անընդունելի արտահայտություններ Ուկրաինայի և դրա շուրջ ստեղծված իրավիճակի վերաբերյալ»։ Հանդիպմանը մասնակցող երկրների հետագա համագործակցության ուղղությունները կարտացոլվեն Կամբոջայի կողմից հրապարակվող ամփոփիչ կոմյունիկեի մեջ։
Խոսելով Ասիա-խաղաղօվկիանոսյան տարածաշրջանում ՆԱՏՕ-ի անդամ երկրների քաղաքականության վերաբերյալ Ռուսաստանի դիրքորոշման մասին՝ Լավրովը հայտարարել է այն ռազմականացնելու նրանց մտադրության մասին:
«ՆԱՏՕ-ն այլևս չի ասում, որ սա զուտ պաշտպանական դաշինք է»,- հիշեցրել է Լավրովը։
Դաշինքի Մադրիդյան գագաթնաժողովում այս ամառ հայտարարվեց, որ ՆԱՏՕ-ն գլոբալ պատասխանատվություն է կրում, և որ Եվրատլանտյան և Հնդկախաղօվկիանոսյան տարածաշրջանների անվտանգությունն անբաժանելի է: Այսպիսով, Լավրովի խոսքով, դաշինքն իր «պաշտպանության գիծը» տեղափոխում է դեպի Հարավչինական ծով և հավակնում տարածաշրջանում առաջատար դերի։
