Ճապոնիայում ոչնչացրել են Երկրորդ համաշխարհային պատերազմի ժամանակների 300-ից ավելի չպայթած ռազմամթերք
Օկինավայի պրեֆեկտուրայի մայրաքաղաք Նահայի իշխանությունները դեկտեմբերի 14-ին ոչնչացրել են Ճապոնիայի հարավի այդ շրջանում հայտնաբերված՝ Երկրորդ համաշխարհային պատերազմի ժամանակների 319 չպայթած ամերիկյան ռումբ և արկ: Այդ մասին հաղորդել է NHK հեռուստաալիքը:
Ռազմամթերքը հայտնաբերվել է Նահայի նավահանգստում հատակախորացման աշխատանքներ կատարելիս: Դրանք ընկղմել են ջուրը և պայթեցրել Ճապոնիայի Ինքնապաշտպանության ծովային ուժերի սակրավորները: Ըստ որում Նահայում ռազմամթերքի ոչնչացման իրականացված գործողությունը եղել է խոշորագույնը 1995 թվականից ի վեր:
NHK-ի տվյալներով՝ Օկինավայի ամբողջ տարածքում տարեկան ոչնչացվում է հայտնաբերված շուրջ 20 տոննա չպայթած ռումբ և արկ:
Օկինավայի համար ճակատամարտն սկսվել է 1945 թվականի ապրիլի 1-ին և շարունակվել է 82 օր: Այն աչքի է ընկել մեծ դաժանությամբ, չնայած ամերիկացի զինվորականներն ունեին կենդանի ուժի բազմակի գերազանցություն և անհամեմատելիորեն գերազանում էին ճապոնական պաշտպանության կրակային հզորությունը: Ճակատամարտի ավարտ է համարվում հունիսի 23-ը, երբ Իտոման քաղաքում ծիսական ինքնասպանություն գործեց ճապոնական կայազորի հրամանատար գեներալ-լեյտենանտ Միցուրու Ուսիձիման՝ իր շաբի անդամների մեծամասնության հետ: Սակայն անջատ-անջատ դիմադրությունն Օկինավայում շարունակվեց մինչև սեպտեմբերի սկիզբը, երբ այնտեղ գործող ճապոնական ջոկատներն իմացան իրենց երկրի կապիտուլյացիայի մասին և վայր դրեցին զենքը, հաղորդել է ՏԱՍՍ-ը:
