Ռուս խաղաղապահների ուղեկցությամբ ավելի քան 250 ուխտավոր այցելել է Ամարաս վանական համալիր
Ռուսական խաղաղապահ զորակազմի խաղաղապահները մեկ շաբաթում ապահովել են ավելի քան 250 ուխտավորի անվտանգ այցելությունն Ամարաս վանական համալիր, որը գտնվում է Լեռնային Ղարաբաղում կողմերի սահմանազատման գծում: Այս մասին ասվում է ՌԴ ՊՆ տեղեկագրում:
Ինչպես նշվում է, ռուսական խաղաղապահ զորակազմի զինծառայողները կանոնավոր հիմքով ապահովում են ուխտավորների անվտանգությունը, որոնք ցանկանում են այցելել վանական համալիր: Ուխտավորները Ստեփանակերտից և եկեղեցու մոտակա բնակավայրերից ժամանում են Մարտունիի շրջան՝ մասնակցելու Ամարասում անցկացվող պատարագին:
Զորակազմի ներկայացուցիչ Ելենա Ցարևսկայան հայտնել է, որ ուխտավորների ժամանումից մեկ օր առաջ անձնակազմը ստուգումներ է իրականացնում վանական համալիրի տարածքում՝ պայթյունավտանգ առարկաների առկայությունը հայտնաբերելու նպատակով:
Հիշեցնենք, որ նոյեմբերի 9-ին Ռուսաստանի, Հայաստանի և Ադրբեջանի ղեկավարները Լեռնային Ղարաբաղում ռուս խաղաղապահների տեղակայման շուրջ պայմանավորվածություն են ձեռք բերել, ստորագրվել է հայտարարություն, որով Ադրբեջանին են անցնում Արցախի յոթ շրջանները, Շուշին ու Հադրութը` բացառությամբ մի գյուղի, գյուղեր Ասկերանի ու Մարտունու շրջանից, ինչպես նաև Մարտակերտի շրջանի Թալիշ և Մատաղիս գյուղերը։
