Միջին խավում գտնվող մարդիկ 2020թ. ընթացքում կորցրել են աշխատանքը, դադարեցրել բիզնեսը՝ համալրելով աղքատների խումբը. տնտեսագետ
Աղքատությունը կրճատելու խոստումներին հակառակ՝ աղքատությունը երկրում աճում է: Վիճակագրական կոմիտեի կողմից հրապարակված զեկույցի համաձայն՝ 2020 թվականին աղքատության մակարդակը կազմել է 27 %: Նախորդ տարի այդ ցուցանիշը 26.4 % էր: Նույն ժամանակահատվածի համար աղքատության մակարդակը՝ ըստ աղքատության վերին գծի, 47.6 % է` նախորդող տարվա 43.8 %-ի փոխարեն, ծայրահեղ աղքատությունը՝ 0.7%՝ 1.4 %-ի փոխարեն, աղքատությունն ըստ ստորին գծի՝ 10.2 %՝ նախորդող 9.7%-ի պարագայում:
Տնտեսագետ Սուրեն Պարսյանը 168.am-ի հետ զրույցում հիշեցրեց, որ 2019 թվականից սկսած՝ ՀՀ-ում աղքատությունը հաշվարկվում է Համաշխարհային բանկի կողմից հաստատված 4-րդ մեթոդաբանությամբ, ըստ որի՝ տարբերակվում են աղքատության 4 շեմեր, ապա անդրադառնալով ցուցանիշներին՝ արձանագրեց. «2020 թվականի համաձայն՝ միջին աղքատությունը կազմել է 27 %՝ նախորդ տարվա համեմատ ավելանալով 0.6 %-ով: Գուցե 0.6 %-ը քիչ է հնչում, բայց 0.6 %-ը հազարավոր մարդիկ են, հարյուրավոր ընտանիքներ, որոնք, ըստ էության, աղքատության մեջ են հայտնվել:
Եթե ուսումնասիրում ենք աղքատությունը բացված վիճակում, ապա կտեսնենք՝ ծայրահեղ աղքատությունը նվազել է 0.7 %-ով, ստորին աղքատությունը՝ 0.5 %-ով, իսկ վերին աղքատությւոնն ավելացել է 3.8 %-ով: Ստացվում է, որ միջին խավում գտնվող մարդիկ 2020 թվականի ընթացքում կորցրել են իրենց աշխատանքը, դադարեցրել բիզնեսը և համալրել աղքատների խումբը, ինչը և նպաստել է, որ աղքատության շեմն աճի 0.6 %-ով»:
Տնտեսագետը նկատեց՝ թեև այս ցուցանիշներն ունեն օբյեկտիվ հիմքեր՝ պայմանավորված տնտեսական անկմամբ, համավարակով, պատերազմական իրավիճակով, սակայն խնդիրն այն է՝ «արդյո՞ք կառավարությունը հետևություններ արել է այս իրավիճակում և ի՞նչ փոփոխություններ է արել 2021 թվականի ընթացքում»:
«Ակնհայտ է, որ 2021 թվականի ընթացքում կառավարությունը ձախողել է իր ողջ սոցիալական քաղաքականությունը: Հաշվի առնելով 6.9 տոկոս գնաճը, ցածր տնտեսական ակտիվությունը և այլն՝ կարող ենք փաստել, որ աղքատությունն էլ ավելի է խորացել 2021 թվականի ընթացքում: Այսինքն՝ նրանք հետևություններ չեն արել:
Ավելին՝ 2022 թվականի պետբյուջեով նրանք չեն նախատեսում եկամուտների համաչափ աճ. առհասարակ, թոշակառուների ընդամենը 17 %-ի համար է եկամուտներն ավելանալու 2000-3000 դրամով, որը նույնիսկ այս տարվա գնաճը չի «փակում»: Ստացվում է՝ մեծ մասի համար եկամուտները մնալու են նույնը, մինչդեռ գնաճն ավելանալու է: Ասել է թե՝ 2020 թվականի իրենց աշխատավարձով կամ թոշակով մարդիկ ավելի շատ ապրանքներ կարող էին ձեռք բերել, քան այս կամ մյուս տարվա աշխատավարձով և թոշակով»,- հավելեց Սուրեն Պարսյանը:
Թե ինչի հաշվին է նվազել ծայրահեղ աղքատության ցուցանիշը՝ մեր հարցին ի պատասխան՝ նա ասաց, որ այդ նվազման մեջ դերակատարում է ունեցել բազային կենսաթոշակի և նվազագույն աշխատավարձի բարձրացումը, մինչդեռ այս տարի, հաշվի առնելով գնաճային միտումները, կարձանագրվի ոչ միայն ծայրահեղ աղքատների թվի աճ, այլև բոլոր խմբերի աղքատության աճ:
