5 գիրք, որ երեխաներին առաջարկում է ընթերցել Վահան Արծրունին
Կոմպոզիտոր, երգիչ, մշակույթի գործիչ Վահան Արծրունին միացել է 168.am-ի շարքին՝ 5 գիրք առաջարկելով երեխաներին: Պարոն Արծրունու հնգյակը նախատեսված է դպրոցահասակ երեխաների համար, որոնց ազատ ժամանակը լրացնելուն կօգնեն երևակայական աշխարհների մասին պատմությունները և ռոմանտիկ հերոսները, որոնք կսովորեցնեն լինել համարձակ, անվախ ու արժանապատիվ:
«Ալիսը Հրաշքների աշխարհում» – Լուիս Քերոլ
Անգլիացի մաթեմատիկոս և գրող Լուիս Քերոլի գիրքը, որը պատմում է Ալիս անունով աղջնակի մասին, երեխաներին կտեղափոխի խորհրդավոր աշխարհ, որտեղ վերջիններս կհետևին Ալիսի արկածներին և կհանդիպեն Սպիտակ Ճագարին, Հերցոգուհուն, Չեշիրյան Կատվին, Որդերի Թագավորին և Թագուհուն, Մարտյան Նապաստակին, Դոդոյին, Քվազի կրիային և շատ այլ զարմանահրաշ կերպարների:
«Երեք հրացանակիրները» – Ալեքսանդր Դյումա
Ալեքսանդր Դյումա Հոր կողմից 1844 թվականին գրված պատմաարկածային վեպը նվիրված է դ’Արտանյանի՝ հրացանակիր դառնալու համար տնից հեռացած մի երիտասարդ մարդու, և նրա երեք ընկերների՝ Աթոսի, Պորտոսի և Արամիսի արկածներին։
«Ալ առագաստներ» – Ալեքսանդր Գրին
Վեպ-հեքիաթ գրել է Ալեքսանդր Գրինը 1916-1922 թվականներին։ Այն պպատմում է Ասոլ անունով աղջկա մասին, որը կորցրել է մորը, երբ ընդամենը ութ ամսական էր։ Ասոլն ապրում է Կապեռնա գյուղակում իր հոր՝ նավաստի Լոնգրենի հետ։ Վերջինս, որ ինքնամփոփ ու անմարդամոտ է, նավաստու աշխատանքից հեռանալուց հետո պատարստում և վաճառում է խաղալիքներ՝ առագաստանավորի ու շոգենավերի գեղեցիկ մոդելներ, որպեսզի ապրուստի միջոցներ վաստակի իր և դստեր համար։
Ալեքսանդր Գրինը վիպակի վրա աշխատել է գրեթե հինգ տարի։
«Այվենհո» – Վալտեր Սքոթ
«Այվենհոն» Վալտեր Սքոթի առաջին վեպն է, համարվում է առաջին պատմական վեպերից մեկը: Վեպի գործողությունները տեղի են ունենում Շոտլանդիայի սահմաններից դուրս։ Իրադարձությունները վերաբերում են 1194 թվականին՝ Հաստինգսի ճակատամարտից 128 տարի անց, որի արդյունքում սաքսերը նվաճվեցին նորմանների կողմից։
«Ջունգլիների գիրքը» – Ռեդյարդ Քիփլինգ
Ռեդյարդ Քիփլինգի պատմվածքների ժողովածուի գլխավոր հերոսները կենդանիներ են։ Բացի այդ որոշ պատմվածքներում գործող անձ է հանդես գալիս Մաուգլին՝ երեխա, որին դաստիարակել էին գայլերը։ Պատմվածքները առաջին անգամ տպագրվել են 1893-1894 թթ. ամսագրերում։ Մի քանի նկարազարդումներ կատարել է Կիպլինգի հայրը՝ Ջոն Կիպլինգը։
Շարքի հեղինակ՝ Անի Գաբուզյան
