Դուբայում բացվել է Expo-2020 համաշխարհային ցուցահանդեսը
Դուբայում բացվել է Expo-2020 համաշխարհային ցուցահանդեսը, որն ավելի վաղ մեկ տարով հետաձգվել էր COVID-19-ի համավարակի պատճառով: Այդ մասին հաղորդել է BBC News-ը:
Ավելի քան 190 երկիր ցուցահանդեսի աշխատանքի 182 օրվա ընթացքում կցուցադրի տեխնիկայի, գիտության եւ արվեստի բնագավառում իր ձեռքբերումներն ու ինովացիաները: Դուբայի կառավարիչ շեյխ Մուհամեդ բեն Ռաշիդ ալ Մաքթումը ցուցահանդեսը բացված է հայտարարել սեպտեմբերի 30-ի երեկոյան տեղի ունեցած արարողության ժամանակ:
Նա «Ալ Բայան» թերթին ասել է, որ սա «բացառիկ իրադարձություն է, որը կտպավորվի մարդկանց հիշողության մեջ: Նա հավելել է, որ ԱՄԷ-ն այդ միջոցառումը կազմակերպում է, «որպեսզի գտնի գլոբալ խնդիրների լուծումը միջազգային համագործակցության հիման վրա, որի կարիքն ունի մարդկությունը»: Դուբայի կառավարությունն այդ միջոցառման վրա ծախսել է մոտավորապես 7 միլիարդ դոլար: Բոլոր երկրների քաղաքացիները կարող են այցելել Արաբական Միացյալ Էմիրություններ, եթե նրանք լիովին պատվաստված են COVID-19-ի դեմ Առողջապահության համաշխարհային կազմակերպության կողմից հավանության արժանացած որեւէ պատվաստանյութով: Ցուցահանդեսում հայտնվելու համար 18 եւ ավելի բարձր տարիքի բոլոր անձինք պետք է ներկայացնեն պատվաստման կամ ՊՇՌ-թեստի բացասական արդյունքի ապացույցներ, հաղորդել է «Ինտերֆաքս»-ը:
