ՈւԵՖԱ-ն շարունակում է պատերազմը «Ռեալի», «Բարսելոնայի» և «Յուվենթուսի» դեմ
ՈւԵՖԱ-ն հայտարարել է «Ռեալի», «Բարսելոնայի» և «Յուվենթուսի» դեմ պահանջներից հրաժարվելու մասին:
Այս թիմերի նկատմամբ կարգապահական գործողություն սկսվեց մայիսի վերջին՝ կապված Եվրոպայի Սուպերլիգայի նախագծի պատճառով ակումբների կողմից ՈւԵՖԱ-ի կանոնակարգի դրույթների հնարավոր խախտման հետ:
Կազմակերպության բողոքարկման մարմինը դատավարություններն անվավեր է ճանաչել. «Կարծես թե դրանք երբեք չէին սկսվել»,- ասված է ՈւԵՖԱ-ի մամուլի հաղորդագրության մեջ:
Միևնույն ժամանակ, չի բացառվում, որ Եվրոպական ֆուտբոլային ասոցիացիաների միությունը հետագայում վերսկսի գործընթացը:
Ավելի վաղ Մադրիդի դատարանը վճռել էր, որ ՈւԵՖԱ-ն չի կարող բացառել Սուպերլիգայի ակումբներին իր մրցաշարերից, ինչպես նաև կազմակերպությանը պարտավորեցրել է հանել բոլոր պատժամիջոցները ներգրավված ակումբների նկատմամբ:
ՈւԵՖԱ-ն հայտարարություն է տարածել Մադրիդի դատարանի վճռի վերաբերյալ։
«Այսպես կոչված, Սուպերլիգայի նախագծի երեկվա հայտարարությունից և ՈւԵՖԱ-ի կողմից ձեռնարկված համապատասխան միջոցառումներից հետո ՈւԵՖԱ-ն կրկնում է իր թեզը, որ, այսպես կոչված, Սուպերլիգայի նախագծի առնչությամբ միշտ գործել է ոչ միայն իր կանոնադրություններին համապատասխան, այլև այլ կանոնակարգերի, ԵՄ օրենսդրությանը, Մարդու իրավունքների եվրոպական կոնվենցիային և շվեյցարական իրավունքին համապատասխան: ՈւԵՖԱ-ն վստահ է իր դիրքորոշմանը և կշարունակի պաշտպանել այն բոլոր համապատասխան իրավասությունների շրջանակներում:
Մադրիդի դատարանում ընթացող դատավարությունների ընթացքում ՈւԵՖԱ-ն միշտ բարեխղճորեն է գործել: Ըստ այդմ, և չնայած այն բանին, որ ՈւԵՖԱ-ն չի ընդունում Մադրիդի դատարանի իրավազորությունը և համոզված է, որ միշտ գործել է լիովին համապատասխան ընթացիկ դատավարությանը, ՈւԵՖԱ-ն այսօր պաշտոնական փաստաթղթեր է ուղարկել Մադրիդի դատարան` հաստատելով ընթացիկ պահանջները:
Բացի այդ, ՈւԵՖԱ-ն միջնորդություն է ներկայացրել վիճարկելու ընթացիկ վարույթը նախագահող դատավորին, քանի որ, նրա կարծիքով, այս վարույթներում կան էական խախտումներ:
ՈւԵՖԱ-ն նաև պաշտոնական բողոք կներկայացնի բարձրագույն դատարան՝ Մադրիդի նահանգային դատարան (Վերաքննիչ դատարան):
ՈւԵՖԱ-ն կշարունակի ձեռնարկել բոլոր անհրաժեշտ քայլերը` ազգային և ԵՄ օրենսդրության խստագույն պահպանմամբ` իր և, ամենակարևորը, ֆուտբոլի իր անդամների և շահագրգիռ կողմերի շահերը պաշտպանելու համար»,- ասվում է ՈւԵՖԱ-ի հայտարարության մեջ:
Սիրարփի Աղաբաբյան
