«Քանի դեռ կա Արցախի դրոշը, կա Արցախի պաշտպանության բանակը, մենք այստեղ ենք». Հովիկ Ասմարյան
«Արցախը հիմա փորձում է իր վերքերը բուժել: Արցախում ապրող հայությունը, սակայն, զգում է, որ մենակ է, որովհետև հույս կամ հավատ չունենք Հայաստանի այսօրվա ղեկավարությունից, թե կարող են որևէ դրական բան անել Արցախի և արցախահայության համար,- 168.am-ի հետ զրույցում նշեց տարիներ առաջ ընտանիքով Ստեփանակերտում հաստատված սիրիահայ Հովիկ Ասմարյանը՝ մանրամասնելով,- Եթե Հայաստանի Հանրապետության ղեկավարությունը չի կարողանում Հայաստանի սահմանային հարցը լուծել, ինչպե՞ս կարող է Արցախի հարցը լուծել: Մեզ համար այնտեղ նստած են մի խումբ մարդիկ, որոնք կյանքում որևէ հաջողության չեն կարողացել հասնել, և պարզապես օգտվելով նախկին ղեկավարության հանդեպ ժողովրդի դժգոհությունից, հասան իշխանության և հասցրին այս վիճակին»:
Հիշեցնենք, 168.am-ը պատերազմի օրերին անդրադարձել էր Ասմարյանների ընտանիքին, որոնք անգամ հրթիռակոծությունների տակ բաց էին պահում «Սամրա» ընտանեկան ռեստորանը, հյուրասիրում, հյուրընկալում Արցախ մեկնող կամավորականներին, սնունդ հասցնում ապաստարաններ: Այդ օրերին անգամ Հովիկ Ասմարյանը վստահորեն ասում էր՝ իր երեխաների ապագան ևս Արցախում է պատկերացնում:
Ասմարյաններն իրենց ապագան այսօր էլ տեսնում են Արցախում:
«Քանի դեռ կա Արցախի դրոշը, կա Արցախի պաշտպանության բանակը, մենք այստեղ ենք»,- ասաց Հովիկ Ասմարյանը:
