«Արցախի համար ստեղծված նոր վտանգը և ՀՀ արտաքին գործերի նախարարության լռությունը»․ Նարեկ Ալոյան

Փաստաբան Նարեկ Ալոյանն իր ֆեյսբուքյան էջում գրում է․ «2021թ-ի օգոստոսի 11-ին Ադրբեջանի Հանրապետության արտաքին գործերի նախարարություն է հրավիրվել Ադրբեջանում Իրանի Իսլամական Հանրապետության դեսպանը։

Պաշտոնական Բաքուն նոտա է հղել դեսպանին և խիստ դժգոհություն հայտնել այն մասին, որ 2021թ-ի հուլիսի 11-ից մինչև օգոստոսի 8-ը իրանական թվով 35 մեքենաներ, որից՝ 31-ը բենզատար մեքենա (бензовоз), իսկ 4-ը բեռնատար մեքենա, առանց պաշտոնական Բաքվի «թույլտվության կատարել են բեռնափոխադրումներ դեպի Արցախ»։

Այսպիսով՝ պաշտոնական Բաքուն ակնկալում է, որ Լաչինի միջանցքով Արցախ կատարվող բեռնափոխադրումները պետք է կատարվեն բացառապես իր «թույլտվությամբ»։

Ավելին՝ ադրբեջանական մամուլի կողմից վերջին շրջանում շարունակաբար թիրախավորվում են ռուս խաղաղապահներն այն բանի համար, որ թույլատրել և թույլատրում են նշված բեռնափոխադրումները։ Մասնավորապես՝ ռուս խաղաղապահների վարքագիծը ադրբեջանցիների կողմից բնորոշվում է որպես «տարօրինակ», «իրենց գոյություն չունեցող մանդատից դուրս», «իրենց ժամանակավոր առաքելությանը անհամապատասխան»։

Դեռևս 2021թ-ի օգոստոսի 11-ին Ադրբեջանի արտաքին գործերի նախարարության կայքում հրապարակվել է Իրանի դեսպանի հետ հանդիպման մասին լուրը։

Հայկական կողմն, առնվազն տեսանելի հարթությունում, լուռ էր։
Այսպիսով՝ Լաչինի միջանցքը Արցախն արտաքին աշխարհի և Հայաստանի հետ կապող ՄԻԱԿ ճանապարհն է։

Այսպիսով՝ դեռևս մեկ ամիս առաջ Ադրբեջանը դիվանագիտական հարթությունում ներկայացրել է այդ ճանապարհով կատարվող բեռնափոխադրումները վերահսկելու հայտ։

Այսպիսով՝ արդեն մեկ ամիս, առնվազն տեսանելի հարթությունում, հայկական դիվանագիտական կորպուսը լուռ է։

Այժմ՝ Գորիս-Կապան միջպետական ճանապարհին տեղակայված է ադրբեջանական ոստիկանական պահակակետ և ՀՀ ազգային անվտանգության ծառայության պաշտոնական պարզաբանման համաձայն՝ այն նախատեսված է Իրանից կատարվող բեռնափոխադրումների փաստաթղթերի ստուգման նպատակով։

Լաչինի միջանցքով Արցախ կատարվող բեռափոխադրումները Ադրբեջանի թույլտվությամբ կատարվելու դեպքում, վտագի տակ է դրվում Արցախի բնականոն կյանքը։

Այս պահին մեր դիվանագիտական կորպուսի առջև բարձրացված է հստակ հարցադրում.
«Արդյո՞ք Լաչինի միջանցքով (այսինքն՝ առկա միակ ճանապարհով) Արցախ բեռնափոխադրումների կատարումը պետք է կատարվի Ադրբեջանի թույլտվությամբ»։

Կարծում եմ, որ պատասխանն ակնհայտ է՝ ՈՉ։

Ընդ որում՝ այդ պատասխանը պետք է տրվեր դեռևս մեկ ամիս առաջ՝ Ադրբեջանի արտաքին գործերի նախարարություն Իրանի դեսպանի կանչվելուց անմիջապես հետո։

Մենք պարտավոր ենք պահպանել մեր հայրենիքը!!!»։