Կարեն Անդրեասյանը լրագրողների հետ ճեպազրույցին ներկայացել էր բավական ագրեսիվ տրամադրվածությամբ
![](https://168.am/wp-content/uploads/2021/08/Karen-Andreasyan-4.jpg)
«Հարցի, կոնկրետ հենց այս իրավիճակի հասցեատերերը, իհարկե, Արտաքին գործերի նախարարությունն է, մեր ռազմական գերատեսչություններն են, բայց կարող եմ ասել՝ բազմիցս վարչապետը նշել է դելիմիտացիայի և դեմարկացիայի, այդ սահմանազատման խնդիրները: Առանց այդ խնդիրների լուծման՝ իրավաբանական արձագանք տալ ձեր հարցին, կարծում եմ, տեղին չի լինի, և հետևաբար՝ ես հիմա չեմ կարող արձագանքել»,- կառավարության նիստից հետո լրագրողների հետ ճեպազրույցում ասաց արդարադատության նախարար Կարեն Անդրեասյանը՝ անդրադառնալով Գորիս-Կապան ճանապարհահատվածում ստեղծված իրավիճակին, Հայաստանի սուվերեն տարածք ադրբեջանցիների ներխուժմանն ու դրա հետ կապված՝ իրավական գործընթացներին:
Հարցին՝ ինչո՞ւ 30 տարի այդ հարցը չէր բարձրացվում, որ, օրինակ, Գորիս-Կապան ճանապարհի մի հատված կա, որ ադրբեջանցիներինն է, որովհետև հիմա եթե Հայաստանն այդ ճանապարհը տալիս է, ստացվում է, որ ինքն ագրեսոր է եղել, ուրիշի ճանապարհ է վերցրել, արդարադատության նախարարը պատասխանեց՝ չբարձրացնողներին պետք է տաք էդ հարցը:
Լրագրողի ճշտող հարցին՝ այսինքն սխա՞լ են արել, որ չեն տվել, նախարարը, հավանաբար հասկանալով, որ նախորդ պատասխանից հետո երևի թե կրկին խոսնակի պարզաբանելու անհրաժեշտությունը կծագի, տվեց խուսափողական պատասխան:
«Նորից եմ ասում, արտաքին քաղաքականության և ռազմական հարցերի մասին արդարադատության նախարարին հարցեր եք ուղղում: Ես ասացի՝ որպեսզի հարցը գա իրավական դաշտ, պետք է լինեն սահմազատման և սահմանագծման որոշակի աշխատանքներ, դրանք պետք է լինեն իրավական որոշակի գործընթացներով, իսկ քանի դեռ դրանք տեղի չեն ունեցել, մնացած բոլոր հարցերն իմ տիրույթից դուրս են»,- ասաց Կարեն Անդրեասյանը:
Անդրադառնալով այն հարցին, թե ստեղծված իրավիճակում, երբ ՀՀ քաղաքացիներն ազատ տեղաշարժի խնդիրներ ունեն ու ըստ էության հայտնվել են շրջափակման մեջ, արդյո՞ք արդարադատության նախարարը մարդու իրավունքների հետ կապված խնդիրներ չի տեսնում, և ի՞նչ է անում այդ առնչությամբ կառավարությունը, Կարեն Անդրեասյանը պատասխանեց՝ մեր մարդու իրավունքների բազմաթիվ խախտումներ են տեղի ունենում հարևան Ադրբեջանի քաղաքականության պատճառով, և դրա մասին բարձրաձայնել են և մեր կառավարությունը, և նախկին կառավարությունները:
«Ցավում եմ, որ գործընթացները չեն գալիս այն բանին, որ մեր հարևան պետության հետ այնպիսի իրավական գործընթացներ տեղի ունենան, որ մեր հարևան պետության պատճառով մեր քաղաքացիների իրավունքները չխախտվեն»,- ասաց նախարարը՝ մեկ նախադասության մեջ Ադրբեջանի առնչությամբ 3 անգամ գործածելով «հարևան» որոշիչը:
Ճեպազրույցի ավարտին Կարեն Անդրեասյանը նշված հարցերը բարձրացնող «Հրապարակի» լրագրող Վահե Մակարյանին մեղադրեց քաղաքական հայտարարություններ անելու մեջ:
«Կարծում եմ՝ մեր հարցազրույցը վերածվեց Ձեր քաղաքական հայտարարություններին: Ես Ձեր քաղաքական հայտարարությունների հետ համաձայն չեմ: Հայաստանի կառավարությունն անում է լավագույնը ստեղծված իրավիճակում: Եվ ես կարծում եմ, որ եթե ուզում եք քաղաքական հայտարարություններ հնչեցնել ու քաղաքականությամբ զբաղվել, դա Ձեր իրավունքն է, բայց ես Ձեզ հետ քաղաքական բանավեճերի մասնակցելու ցանկություն չունեմ»,- ասաց նախարարը:
Արդարադատության նախարարը կրկին նկատեց, որ այս ոլորտը գտնվում է Պաշտպանության նախարարության ու Արտաքին գործերի նախարարությունների տիրույթում:
«Եվ ես խորհուրդ կտամ մեր այլ պետական կառույցներին, որոշակի իրավապաշտպաններին, այլ մարդկանց, ովքեր իրական անելիք այստեղ դեռևս չունեն, համբերությամբ լցվենք, վստահենք մեր այն պրոֆեսիոնալ գործընկերներին, որոնք աշխատում են: Հենց որ մեր գերատեսչության իրավասությունների շրջան կգա այս հարցը, մենք պատրաստ ենք: Բնականաբար, սա մեր առաջնահերթ խնդիրն է, մեզ մտահոգող ցավոտ խնդիրներից է, և մենք պատրաստ ենք աշխատել»,- ասաց արդարադատության նախարարը:
Կարեն Անդրեասյանը, ով ժամանակին ՄԻՊ է եղել, իսկ դրանից առաջ էլ հանդես է եկել մեդիայի ազատության կարևորության մասին հայտարարություններով ու հրապարակումներով, ակնհայտ անհանդուրժողական վերաբերմունք էր ցուցաբերում լրագրողների նկատմամբ, հեգնում նրանց՝ իրեն հարց տվող Yerevan.today-ի լրագրողի հարցին, օրինակ, արձագանքելով՝ Դուք ավարտեցի՞ք Ձեր ելույթը…
«Ես Ձեր երկրորդ ելույթն էլ լսեցի և կարող եմ ասել, որ Արդարադատության նախարարությունը զբաղվում է իր գործառույթներով: Այստեղ հնչեցին քաղաքական գնահատականներ լրագրողական հարցի անվան տակ, որոնց հետ ես համաձայն չեմ… Լրագրողներից այլ հարցեր կա՞ն, ոչ քաղաքական գործիչներից»,- իր ճեպազրույցն այսպես եզրափակեց արդարադատության նախարար Կարեն Անդրեասյանը: