ԱՀԿ-ի ղեկավարը կոչ է արել պատրաստվել նոր համավարակների
Համաշխարհային հանրությունը պետք է դասեր քաղի կորոնավիրուսի համավարակից և պատրաստվի նոր համավարակների։ Այս մասին հայտարարել է Առողջապահության համաշխարհային կազմակերպության (ԱՀԿ) ղեկավար Թեդրոս Ադհանոմ Ղեբրեյեսուսը։
Դիմելով զարգացող փոքր կղզի-պետությունների առողջապահության գագաթնաժողովի (Small Island Developing States Summit, SIDS Summit ) մասնակիցներին՝ նա նշել է. «Մենք բոլորս պետք է լավ սերտենք այս համավարակի դասերը»։
ԱՀԿ-ի ղեկավարի խոսքով՝ անհրաժեշտ է «հնարավոր ամեն ինչ անել նոր համավարակներին նախապատրաստվելու, դրանք կանխարգելելու, հայտնաբերելու և արագ արձագանքելու համար»։
Խոսելով COVID-19 համավարակի մասին՝ Ղեբրեյեսուսն ուշադրություն է հրավիրել «պատվաստանյութի անհավասարության և ազգայնականացման» վրա, որի պատճառով մեծանում է «հարուստ և աղքատ երկրների միջև անջրպետը»:
Նրա խոսքով՝ եթե երկրները միանան COVAX մեխանիզմին, ապա մինչև սեպտեմբեր հնարավոր կլինի պատվաստել յուրաքանչյուր երկրի բնակչության առնվազն 10 տոկոսին, իսկ մինչև տարեվերջ՝ առնվազն 40 տոկոսին։
