Պուտինն առաջարկել է Կադիրովին կրկին մասնակցել Չեչնիայի ղեկավարի ընտրություններին
Ռուսաստանի Դաշնության նախագահ Վլադիմիր Պուտինն առաջարկել է Չեչնիայի ղեկավար Ռամզան Կադիրովին կրկին մասնակցել տարածաշրջանի ղեկավարի ընտրություններին, որոնք տեղի կունենան միասնական քվեարկության օրը՝ սեպտեմբերի 19-ին: Այս մասին հայտնում է ՏԱՍՍ-ը:
Տեսակապի միջոցով Պուտինի հետ հանդիպմանը Կադիրովը հայտնել է, որ Չեչնիան լիովին պատրաստ է ընտրությունների անցկացմանը:
«Դուք շատ լավ գիտեք իրադրությունը ներսում, այդ իսկ պատճառով կարծում եմ, որ պետք է մասնակցեք ընտրություններին, առաջարկեք ձեր աշխատանքը»,- ասել է Պուտինը՝ հաջողություն մաղթելով Կադիրովին:
Ռամզան Կադիրովը ղեկավարում է Չեչնիան արդեն 14 տարի: Նա 2016 թվականին տեղի ունեցած ընտրություններին ստացել էր ձայների բացարձակ մեծամասնությունը՝ ավելի քան 97 տոկոսը:
