Ճապոնիան 800 մլն դոլար կհատկացնի կարիքավոր երկրներում COVID-19-ի դեմ պատվաստումների համար

Ճապոնիայի վարչապետ Յոսիհիդե Սուգան առցանց-գագաթնաժողովի ժամանակ խոստանում է մինչեւ 800 մլն դոլար հատկացնել COVAX միջազգային ծրագրի զարգացման համար, որը COVID-19-ի դեմ պատվաստանյութեր է տրամադրում կարիքավոր երկրներին: Այդ մասին հաղորդել է The Mainichi թերթը՝ վկայակոչելով կառավարական աղբյուրների:

Յոսիհիդե Սուգան հանդես կգա որպես COVAX-ի առցանց գագաթնաժողովի ընդունող երկիր, որը տեղի կունենա հունիսի 2-ին: Դրան կմասնակցեն մոտավորապես 40 երկրների ներկայացուցիչներ, ներառյալ ԱՄՆ-ի փոխվարչապետ Քամալա Հարիսը, Եվրահանձնաժողովի ղեկավար Ուրսուլա ֆոն դեր Լյայենը եւ Microsoft Corp.-ի համահիմնադիր ու մարդասեր Բիլ Գեյթսը:

Հրատարակության աղբյուրների տվյալներով, միջոցառման ընթացքում Ճապոնիայի վարչապետը նաեւ պլանավորում է COVAX-ին առաջարկել Ճապոնիայի կողմից գնված կորոնավիրուսի դեմ պատվաստանութերի չափաբաժինների մի մասը: Թե չափաբաժնի ինչ քանակության մասին է խոսքը, չի ճշտվում:

COVAX-ի հիմնադրամը ձգտում է ապահովել 8,3 մլրդ դոլարի չափով ֆինանսավորումը, որը բավարար է մինչեւ 2022 թվականի սկիզբը 1,8 մլրդ չափաբաժնի կամ զարգացող երկրների բնակչության 30 տոկոսի համար:

Նախաձեռնությունը, որն աջակցվում է ՄԱԿ-ի կողմից, ներկայում հավաքել է շուրջ 7 մլրդ դոլար:

Ավելի վաղ Ճապոնիան արդեն խոստացել էր 200 մլն դոլար հատկացնել COVAX ծրագրի աջակցմանը:

Առողջապահության համաշխարհային կազմակերպությունը (ԱՀԿ), Առեւտրի համաշխարհային կազմակերպությունը (ԱՀԿ) եւ Արժույթի միջազգային հիմնադրամը (ԱՄՀ) հունիսի 1-ին հանդես են եկել հանուն COVID-19-ի դեմ պատվաստանյութերի արդարացի բաշխման: Բացի դրանից, կազմակերպությունները կոչ են արել 50 մլրդ դոլար հատկացնել ցածր եւ միջին մակարդակի եկամուտներ ունեցող երկրներում համավարակի կասեցման համար, հաղորդել է «Ինտերֆաքս»-ը: