«Ընտրությունների վերահսկման կոմիտե»-ն կունենա 100 դիտորդ, կգործի շարժական ֆորմատով ու մի քանի ուղղությամբ
![](https://168.am/wp-content/uploads/2021/06/193251157_381767579913970_6519238983009977638_n.jpg)
Երեկ հայտնի դարձավ, որ իրավապաշտպան Ռուբեն Մելիքյանը, ԱԺ անկախ պատգամավոր Նաիրա Զոհրաբյանը, «Քաղաքացիական գիտակցություն» ՀԿ նախագահ Նարեկ Սամսոնյանը, «Մեդիապաշտպան» նախաձեռնության հիմնադիր Աղասի Ենոքյանը և փաստաբան Անահիտ Սարգսյանը հունիսի 20-ին նշանակված արտահերթ խորհրդարանական ընտրությունների ողջ ընթացքում հանրային վերահսկողություն իրականացնելու նպատակով հիմնել են «Ընտրությունների վերահսկման կոմիտե»:
Այսօր հրավիրված ասուլիսի ընթացքում իրավապաշտպան Ռուբեն Մելիքյանը տեղեկացրեց, որ կոմիտեն ստեղծելու գաղափարը ծնվել է դեռ անցած տարի՝ իշխանությունների նախաձեռնած սահմանադրական հանրաքվեի նախապատրաստական փուլում, ձևավորվել էր իրավաբաններից կազմված «Ոչ»-ի քարոզչական խումբը, որում ներառված էին Ռուբեն Մելիքյանը և Անահիտ Սարգսյանը:
Ռուբեն Մելիքյանի փոխանցմամբ՝ «Ընտրությունների վերահսկման կոմիտեի» կազմում ընդգրկված հինգ գործիչներին միավորում է 3 բան՝ գիտակցում, փորձառություն և կամք:
«Գիտակցում նրա, որ այս արտահերթ ընտրություններն իրենցից ներկայացնում են ոչ թե արտահերթ՝ բառիս տեխնիկական իմաստով, այլ ի տարբերություն մեր երկրում բոլոր ընտրական գործընթացների՝ այս ընտրական գործընթացը, մեր բոլորի համոզմամբ, լինել-չլինելու մակարդակի կարևորության հարց է: Երկրորդ՝ մեզ միավորում է փորձառությունը տարբեր ոլորտներում՝ իշխանությունների նկատմամբ հանրային վերահսկողություն իրականացնելու առումով…»,- ասաց Ռուբեն Մելիքյանը:
Նախաձեռնության անդամների փոխանցմամբ՝ կոմիտեն բազմաֆունկցիոնալ է լինելու, գործունեությունը տարածվելու է՝ ինչպես նախընտրական ժամանակահատվածում՝ պաշտոնական քարոզչության, դրան նախորդող ժամանակահատվածում և քվեարկության օրը, այնպես էլ, եթե այդպիսիք լինեն, հետընտրական գործընթացների դեպքում:
«Մենք այս անգամ էլ ենք դիտորդություն անելու, դիտորդական առաքելությունը շուրջ 100 դիտորդներից բաղկացած կլինի: Բայց դիտորդների ֆունկցիոնալությունը լինելու է շատ տարբեր: Քանի որ այլ քաղաքացիական և նաև քաղաքական վերահսկողություն իրականացնող, այսինքն՝ ընտրություններին մասնակցող ուժերի կողմից ակնկալում ենք, որ տեղեկատվության փոխանակում լինելու է, մենք ավելի շատ աշխատելու ենք շրջիկ տրամաբանությամբ»,- ասուլիսի ընթացքում հայտնեց Նարեկ Սամսոնյանը:
Անահիտ Սարգսյանն իրականացնելու է ողջ գործընթացի նկատմամբ իրավական վերահսկողություն, Նաիրա Զոհրաբյանն ապահովելու է կապը միջազգային կառույցների, դիտորդների հետ, իսկ Աղասի Ենոքյանն իրականացնելու է հանրային, պետական ֆինանսավորում ունեցող ԶԼՄ-ների՝ Հանրային հեռուստաընկերության և Հանրային ռադիոյի նկատմամբ վերահսկողությունը: