«Որևէ մտահոգիչ բան չկա». ԱԱԾ տնօրենի տեղակալը՝ Արա Այվազյանի հայտարարության մասին
Արտաքին գործերի նախկին նախարար Արա Այվազյանը հրաժարականի դիմում ներկայացնելուց 4 օր անց հրաժեշտի հանդիպում էր ունեցել նախարարության անձնակազմի հետ, որոշակի փակագծեր էր բացել իր հրաժարականի պատճառների մասին, առանց հստակ մանրամասներ ներկայացնելու։
«Հուսով եմ, որ ձեզ ամոթով չեմ թողել, և իմ հրաժարականի որոշումը պայմանավորված էր հենց այդ պատճառով, որպեսզի երբևիցե որևէ կասկած չլինի, որ այս նախարարությունը կարող է ինչ-որ քայլ անել կամ համաձայնություն տալ ինչ-որ գաղափարների, նախաձեռնությունների, որոնք մեր պետականության, մեր ազգային և պետական շահի դեմ են եղել»,- ասել էր Արա Այվազյանը:
Այսօր խորհրդարանում լրագրողների հետ զրույցում Ազգային անվտանգության ծառայության տնօրենի տեղակալ Արամ Հակոբյանն ասաց, որ չի կարող մեկնաբանել արտգործնախարարի ասածները.«Եթե հարցեր ունեք, նրան տվեք, նա ձեզ կպատասխանի»,- առաջարկեց լրագրողներին Արամ Հակոբյանը։
Հարցին, թե Արա Այվազյանի խոսքերում որևէ մտահոգիչ բան չկա՞, ԱԱԾ տնօրենի տեղակալը պատասխանեց. «Որևէ մտահոգիչ բան չկա»։
