«Իմքայլականները սարսափելի վախեցած էին, նույնիսկ՝ իրենց կանանց հրետանին էին մղել առաջնագիծ». Հռիփսիմե Առաքելյան

Երևանի ավագանու «Բարգավաճ Հայաստան» խմբակցության անդամ Հռիփսիմե Առաքելյանի կարծիքով՝ «Լույս» խմբակցության ղեկավար Դավիթ Խաժակյանի ու նույն խմբակցության անդամ Թեհմինա Վարդանյանի ներկայացրած առաջարկը՝ հրաժարականի պահանջով ուղերձ հղել Նիկոլ Փաշինյանին ու իր Կառավարությանը, իմքայլականներին սարսափի մեջ էր գցել:

«Իմքայլականներն այդ նախագիծը, բնականաբար, չէին ցանկանա տեսնել օրակարգում, սակայն օրենքի ուժով դա պարզապես հնարավոր չէր. Եթե ավագանու անդամը որևէ նախագիծ դնում է շրջանառության մեջ, ապա, միևնույն է, վերջնական հանգրվանը պետք է լինի այն, որ պետք է ներառվի ավագանու օրակարգում: Դավիթ Խաժակյանն ու Թեհմինա Վարդանյանը օրակարգում ներառեցին այս նախագիծը, որը լակմուսի թղթի պես բան պետք է լիներ, որպեսզի մենք էլ հասկանանք, թե իրենց հոգում թաքնված թրթիռներն ու գրգիռները՝ ուղղված իրենց առաջնորդին, իմքայլականներն ինչպես կարտահայտեն: Բնականաբար, սարսափելի վախեցած էին, որովհետև առերեսվել իրականության հետ՝ իսկապես բարդ է: Նրանք լարվել էին, և այդ լարվածությունն իր գերադրական աստիճանին հասավ, երբ տեղից սկսել էին գոռալ, նույնիսկ՝ իրենց կանանց հրետանին էին մղել ավագանու առաջնագիծ և այդպես մարտնչում էին: Մթնոլորտը թեժացել էր»,- 168TV-ի «Ռեվյու» հաղորդման ընթացքում ասաց նա՝ ընդգծելով, որ ավագանու նիստին տեղի ունեցած միջադեպը ոչ թե տեսակետների բախում էր, այլ՝ հայրենիք սիրողների և չսիրողների:

Հռիփսիմե Առաքելյանի խոսքով՝ քվեարկությունն օգնեց, որ ընդդիմադիր խմբակցություններն էլ հասկանան, թե ովքեր կարող են լինել Հռոմի պապից ավելի կաթոլիկ. «Այնտեղ մարդիկ կային՝ ընդհանրապես ծպտուն չէին հանում, մարդիկ էլ կային, որ ճվճվում էին, որ հետո շեֆը նայեր՝ տեսներ՝ ոնց են տեղից ճվճվում. ճվճվալը քաղաքական կատեգորիա է այդ խմբակցությունում»:

Նա ընդգծեց, որ մոտ 3 տարվա ընթացքում դեպք չի գրանցվել, որ ավագանու 65 անդամներն էլ ներկա գտնվեն. «65 մանդատից 5-ը «Բարգավաճ Հայաստան» խմբակցությանն է, 3-ը՝ «Լույս» խմբակցությանը, այսինքն՝ 65-ից 8-ն ընդդիմադիր խմբակցություններն են, 57-ն իրենք են: Մենք միշտ պարտաճանաչ լինում ենք բոլոր նիստերին, միշտ ակտիվ մասնակցում ենք բոլոր գործընթացներին: Իսկ այդ 57-ից կեսին անգամ ես չեմ ճանաչում, եթե անգամ իրենք գալիս էլ են, ապա այնքա՜ն պասիվ դիրքորոշում ունեն, ընդամենը կոճակ սեղմողների մի խումբ է, որ իրենց կասեն՝ սա այսպես ենք քվեարկելու, նա այնպես ենք քվեարկելու»:

Նրա դիտարկմամբ՝ իմքայլականները հիմա ծանր վիճակում են. «Ես երեկ իմ ելույթի ժամանակ խոսեցի այդ մասին և Մարությանին ասացի, որ որպես քաղաքապետ՝ ինչպե՞ս կարող է լռել և որևէ դիրքորոշում չհայտնել: Ես ապշած եմ այս տղայի վարքի, բարքի և գործելաոճի վրա առհասարակ: Ի դեպ, ինձ համար շատ ավելի ազնիվ կլիներ, որ ինքը գոնե իր թիմին պաշտպաներ: Ինքը ո՛չ իր թիմին է պաշտպանում, ո՛չ իր թիմի կողքին է՝ վիզուալ, որ մենք նայում ենք, չկա, ո՛չ այս ամբողջ աղետալի իրադարձությունների մասին ունի որևէ տեսակետ, ունի որևէ կարծիք, դիրքորոշում, ոչ մի բան: Այս տղան ուղղակի ամորֆ վիճակում այնտեղ նստած է, բյուջեն էլ չի կատարում: Նա լուռ է, ձայն չի հանում, ետնամուտքով մտնում-դուրս է գալիս, պարզ չէ՝ երբ է գալիս, երբ է գնում, բյուջեն էլ չի կատարել»:

Հարցին՝ այսինքն՝ կարծում է, որ Հայկ Մարությանը դեմ է Նիկոլ Փաշինյանին, պարզապես չի՞ բարձրաձայնում, նա պատասխանեց. «Ոչ թե դեմ է, այլ մանթրաժ է, և չգիտի՝ այս դեպքում իրեն ինչպես պահել, և նաև իրենց թիմի ներսում կան մի քանի թևեր: ՔՊ-ում կան բազում թևեր և այդ թևերը շատ հետաքրքիր հակամարտություն ունեն մեկը մյուսի նկատմամբ, նրանք կարող են միմյանց շատ ավելի ատել, քան դրսում իրենց հրաժարականը պահանջող ընդդիմությանը: Դրա համար ես չեմ կարող ասել, թե ինչ խմորումներ են, բայց Հայկոն որոշել է բոլորին ապացուցել, որ՝ այ, տեսեք, ես ոչ կգնամ, ոչ էլ, գնում եք՝ դուք գնացեք»:

Նա հավելեց, որ իշխանությունների մեջ անգամ մի մասնագետ չկա. «Փողոցից բոլորը եկան իշխանության, դրա համար երկիրը տվեցին քամուն»:

Մանրամասները՝ 168TV-ի տեսանյութում