ՌԴ նախագահը հրամանագիր է ստորագրել ազատազրկման վայրերում բջջային կապի արգելափակման մասին
Համաձայն օրենքի՝ բջջային օպերատորները պարտավոր կլինեն դադարեցնել այն համարներին ծառայությունների մատուցումը, որոնք օգտագործվում են Ձերբակալվածների պահման վայրերում (ՁՊՎ), բանտերում և ուղղիչ հիմնարկներում կասկածյալ, դատապարտյալ կամ մեղադրյալ անձանց կողմից:
Այս մասին տեղեկացնում է tass.ru-ն:
Ծառայությունների մատուցման դադարեցումը տեղի կունենա Պատիժների կատարման ֆեդերալ ծառայության բարձրաստիճան պաշտոնյաների գրավոր որոշման հիման վրա:
Նախաձեռնության հեղինակները նշել են, որ ազատազրկման վայրերում բջջային հեռախոսները հաճախ օգտագործվում են խարդախություն կատարելու, վկաների վրա ճնշում գործադրելու, ազատության մեջ գտնվող կազմակերպված հանցավոր խմբավորումների անդամների գործողությունները համակարգելու համար:
Փաստաթղթի հեղինակների կարծիքով՝ սիմ-քարտերի օպերատիվ արգելափակումը կնպաստի նաև հանցավոր միջավայրի ղեկավարների ֆինանսավորման, դատապարտյալներին ու կալանավորված անձանց թմրանյութեր ու այլ արգելված իրեր փոխանցելու դադարեցմանը:
Թարգմանեց և հրապարակման պատրաստեց 168.am-ը:
