«Ես եկեղեցում եմ, հավատացյալներն են այստեղ». Սիսիանի եկեղեցու քահանա Տեր Պարգև
Այսօր Սյունիքի մարզ կատարած իր ձախողված այցի ընթացքում Նիկոլ Փաշինյանը, ով կարողացավ Սյունիքում մտնել միայն Սառնաղբյուր և Սիսիան համայնքներ, այցելեց Սիսիանի Սուրբ Գրիգոր եկեղեցի, ուր քահանան՝ Տեր Պարգև քահանա Զեյնալյանը, չսեղմեց Նիկոլ Փաշինյանի ձեռքը՝ դրանով իսկ ցույց տալով իր վերաբերմունքը նրա ու նրա վարած քաղաքականության նկատմամբ:
Քիչ անց Սիսիանի եկեղեցու հոգևոր հովվի վրա ուղիղ եթերում հարձակում գործելու կոչ հնչեցրեց «Քաղաքացիական պայմանագիր» կուսակցության անդամ Արսեն Ավագյանը, ով աշխատում է ՀՀ քաղաքաշինության, տեխնիկական և հրդեհային անվտանգության տեսչական մարմնում: Այսինքն` քահանայի վրա հարձակում պլանավորողը ՀՀ պետական ապարատի ծառայող է:
Ապա տեղեկատվություն տարածվեց, որ Պարգև քահանայի տունը Նիկոլ Փաշինյանի ցուցմամբ՝ խուզարկում են, և որ վարչապետի աթոռը զբաղեցնող անձը հրահանգել է դաժան հաշվեհարդար տեսնել նրա հետ:
168.am-ը կապ հաստատեց Սիսիանի Սուրբ Գրիգոր եկեղեցու քահանա Տեր Պարգև Զեյնալյանի հետ:
– Տեր Պարգև, տեղեկություններ կան, որ Ձեր բնակարանը խուզարկում են:
– Չէ, ես տեղյակ չեմ, ես եկեղեցում եմ:
– Տեսանյութ հրապարակվեց, որում եկեղեցու մոտ մարդիկ էին եկել, Ձեզ եկեղեցի չթողնելու կոչեր էին հնչեցնում:
– Այստեղ չեն հիմա, չգիտեմ՝ ուր են:
– Ձեր անվտանգությունն ապահովվա՞ծ է, ոստիկանություն կա՞ այդտեղ:
– Չէ, ոստիկանություն չկա: Ես եկեղեցում եմ, հավատացյալներն են այստեղ:
– Նրանց կողմից Ձեր նկատմամբ վատ վերաբերմունք չկա՞:
– Չէ, չկա նման բան:
– Իսկ Ձեր բնակարանում կա՞ն մարդիկ, որոնք կարող են ասել՝ այնուամենայնիվ, խուզարկություն իրականացվո՞ւմ է թե՞ ոչ:
-Չէ, տանը ոչ մի խնդիր չկա:
