«Հաշվի առնելով մտահոգությունները՝ կառավարությունը ԶԼՄ սահմանափակումների մասով որոշակի փոփոխություններ է արել»․ փոխնախարար
«Չի կարող կառավարության որոշմամբ սահմանվել, թե որ դեպքերում պետք է կիրառվեն մեկուսացումը կամ ինքնամեկուսացումը, որովհետև ըստ համաճարակի դեմ պայքարի անհրաժեշտության է դա որոշվելու»,-այսօր խորհրդարանում հայտարարեց արդարադատության փոխնախարար Վահե Դանիելյանը։
Ինչ վերաբերում է ԶԼՄ սահմանափակումներին, նա ասաց, որ հաշվի առնելով մտահոգությունները՝ կառավարությունը որոշակի փոփոխություններ է արել․ «Դրանց համաձայն՝ պաշտոնական տեղեկատվությունը միջազգային կազմակերպությունների կողմից ևս համարվելու է պաշտոնական, և դրանց հղում անելով՝ կարող են այդ տեղեկատվությունը դարձնել հասանելի»։
Փոխնախարարը նկատեց՝ այնպես չէ, որ արտակարգ դրությամբ ստեղծված իրավիճակում բոլոր տնտեսվարողները տուժում են կամ նրանց համար ստեղծվում է ֆորսմաժորային իրավիճակ․ «Հնարավոր է՝ այլ տնտեսվարող սուբյեկտները շատ նորմալ իրենց գործունեությունն են ծավալում, կամ ավելին՝ ավելի լավ գործունեություն են ծավալում»։
