«Յուրաքանչյուր քաղաքացու վերաբերյալ հո պարե՞տը չի որոշում կայացնելու»․ Արարատ Միրզոյանը՝ փոխնախարարին
«Այս լրացումների իմաստը բոլորովին այն չէ, որ մեր քաղաքացիներին ենթարկենք վարչական կամ քրեական պատասխանատվության, այլ համաճարակը առհասարակ կանխելն է»,-այսօր խորհրդարանում հայտարարեց արդարադատության փոխնախարար Վահե Դանիելյանը։
ԱԺ նախագահ Արարատ Միրզոյանը հետաքրքրվեց՝ ինքնամեկուսացման պահանջը պետք է լինի գրավո՞ր, թե՞, և եթե պետք է լինի գրավոր, ապա ով է այդ իրավասու անձը։ «Հասկացանք, որ պարետն է, բայց յուրաքանչյուր քաղաքացու վերաբերյալ հո պարե՞տը չի որոշում կայացնելու»,- նկատեց ԱԺ նախագահը։
«Պարետի ցուցմամբ կամ որոշմամբ կսահմանվի կոնկրետ ռեժիմ և կսահմանվեն մանրամասները։ Այս պահին այդ մանրամասները սահմանված չեն, որովհետև արտակարգ իրավիճակի հիմքով արտակարգ դրության ռեժիմի մեր օրենսդրությունը թերի է և անհրաժեշտություն կա կատարելագործման։ Մենք նախագծեր ունենք, որ հրատապությամբ պայմանավորված այս պահին չկարողացանք բերել, բայց հետագայում կբերենք, լրիվ մանրամասներով թե՛ մեկուսացման, թե՛ ինքնամեկուսացման, թե՛ կարանտինի, թե՛ այլ հակահամաճարակային սահմանափակող միջոցառումներ»։
