Թուրքիայի Ադանա քաղաքում խուճապ առաջացնելու համար քաղաքացի է ձերբակալվել
Թուրքիայի Ադանա քաղաքում մոտ 10.000 մարդու sms հաղորդագրություն էր ուղարկվել նոր տեսակի կորոնավիրուսի հետ կապված, որում նշված է եղել. «Ձեր տեստի արդյունքը դրական է»։ Այս մասին տեղեկացնում է ermenihaber.am-ը:
Հաղորդագրությունն ուղարկվել է Ադանայի քաղաքային հիվանդանոցի անունից և նշված է եղել նաև բժիշկի անունը։
Ադանայի նահանգապետարանը հետաքննություն է սկսել դեպքի առնչությամբ և պարզել, որ հիվանդանոցում այդ անունով բժիշկ չկա և հաղորդագրությունը կեղծ է։
Ձեռնարկված միջոցառումների արդյունքում պարզվել է, որ կեղծ հաղորդագրության հեղինակը Ադանային Չուքուրովա վարչական շրջանի համայնքապետարանի աշխատակից Ա.Թ.-ն է։ Նրան հասարակության մեջ վախ և խուճապ առաջացնելու մեղադրանքով ձերբակալել են։
