Գրիգոր Հայրապետյանը կշարունակի ղեկավարել «Թիվ 1 բորտը»
Այսօր լրատվամիջոցներից մեկը տեղեկատվություն հրապարակեց այն մասին, որ աշխատանքից ազատման դիմում է գրել «Թիվ 1 բորտի» հրամանատարը՝ ՀՀ քաղավիացիայի կոմիտեի Թռիչքային գործունեության վարչության պետ Գրիգոր Հայրապետյանը։
Կայքը նաև հիշեցրել էր, որ վերջինս քաղավիացիայի ոլորտում է աշխատում 1973 թվականից, և վերջին տարիներին, 2015-ից սկսած՝ երկրի թիվ մեկ բորտի հրամանատարն էր՝ ապահովելով Սերժ Սարգսյանի, ապա նաև՝ Նիկոլ Փաշինյանի անվտանգ թռիչքները տարբեր երկրներ։
168.am-ի հետ զրույցում Գրիգոր Հայրապետյանը նախ ասաց, որ չի ուզում, որ տեղեկությունը քաղաքականացվի, ու խնդրեց սպասել պաշտոնական տեղեկատվության: Ասաց միայն, որ լրիվ անձնական պատճառներից ելնելով՝ ընտրել է երկու աշխատանքներից մեկը՝ մնալ օդաչու:
Մեր հարցին, թե ճի՞շտ ենք հասկացել, որ խոսքը երկու պաշտոններն այլևս չհամատեղելու մասին է, «Թիվ 1 բորտի» հրամանատարն ասաց՝ այո, Դուք ճիշտ հասկացաք. դրանք երկու տարբեր զբաղվածություններ են:
«Ես 2007թ.-ից «Թիվ 1 բորտի» հրամանատարն եմ: Ես սկսել եմ ոչ թե պարոն Սարգսյանի (ՀՀ երրորդ նախագահ Սերժ Սարգսյան.- Գ.Ս.), այլ պարոն Քոչարյանի (ՀՀ երկրորդ նախագահ Ռոբերտ Քոչարյան.- Գ.Ս.) հետ և մինչև օրս էլ մնում եմ դեռ այստեղ»,- ասաց Գրիգոր Հայրապետյանը՝ շեշտելով, որ շարունակելու է մնալ որպես «Թիվ 1 բորտի» հրամանատար՝ թողնելով սոսկ վարչության պետի պաշտոնը, որովհետև դրանք համատեղելն իր համար բարդ է:
Հ.Գ. Վերջում ուզում ենք նշել Գրիգոր Հայրապետյանի՝ լրագրողների հետ շփվելու բացառիկ կուլտուրան, և ցանկանում հուսալ, որ նորընծա մեր պաշտոնյաներն օրինակ կվերցնեն փորձառու հրամանատարից, որի կենսափորձը նրանցից շատերի համար շատ լավ դաս կարող է լինել:
