Ի՞նչ է իրանից ներկայացնում պաշտոնապես ներկայացված 3-րդ եվրագավաթը

ՈՒԵՖԱ-ն պաշտոնապես հայտարարել է եվրոպական 3-րդ կարևորագույն ակումբային մրցույթի ներդրման մասին:

Մրցաշարը կկոչվի Կոնֆերենցիայի լիգա և կսկսվի 2021 թվականից:

Հաղորդվում է, որ լիգան  թույլ կտա ավելի շատ եվրոպական ակումբների մասնակցել միջազգային ասպարեզում հանդիպումների:

Նոր մրցաշարը կանցկացվի նույն կերպ, ինչ Չեմպիոնների լիգան և Եվրոպա լիգան, սակայն այնտեղ կմասնակցեն 32 ակումբներ:

Ձևաչափն ընդգրկում է խմբային մրցաշար, 1/8 եզրափակիչ, 1/4 եզրափակիչ, կիսաեզրափակիչ և եզրափակիչ:

1/8 եզրափակչից առաջ կանցկացվի փլեյ-օֆիի լրացուցիչ տուր: Այդ տուրին կմասնակցեն մրցաշարի խմբերի 2-րդ հորիզոնականները և Եվրոպա լիգայի խմբերի 3-րդ հորիզոնականները:

Նոր մրցաշարի ընթացքում 15 օրում կանցկացվի 141 խաղ՝ այնպես, ինչպես Եվրոպա լիգայում:

Մրցաշարի հաղթողը հնարավորություն կունենա հաջորդ մրցաշարում խաղալ Եվրոպա լիգայում:

Խաղերը կանցկացվեն հինգշաբթի օրերին: Այսինքն՝ Չեմպիոնների լիգայի խաղերն առաջվա նման կանցկացվեն երեքշաբթի և չորեքշաբթի օրերին, իսկ Եվրոպա լիգան և նոր մրցաշարը՝ հինգշաբթի:

Բոլոր ակումբային մրցաշարերի եզրափակիչները կանցկացվեն մեկ շաբաթում` չորեքշաբթի (նոր մրցաշար), հինգշաբթի (Եվրոպայի լիգա) և շաբաթ (Չեմպիոնների լիգա):

ՈՒԵՖԱ-ի նախագահ Ալեքսանդր Չեֆերինը մեկնաբանել է ակումբային երրորդ մրցաշարի ստեղծումը:

«ՈՒԵՖԱ-ի նոր ակումբային մրցաշարը եվրոպական գավաթները կդարձնեն ավելի ընդգրկուն, քան երբևէ: Ավելի շատ հանդիպումներ՝ ավելի շատ ակումբների համար, ավելի շատ ասոցիացիաներ խմբային փուլերում:

Մրցաշարի գաղափարը զարգացել է եվրոպական բոլոր ակումբների հետ պարբերական երկխոսությունների արդյունքում:

Բոլոր ակումբները հետաքրքրություն են ցուցաբերել եվրոպական մրցաշարերում մասնակցության ավելի մեծ հնարավորություններ ունենալու նկատմամբ: Սա հնարավոր է դարձել ռազմավարական մոտեցման շնորհիվ:

Արդյունքը համապատասխանում է ՈՒԵՖԱ-ի խնդիրներին՝ ավելացնել մեր ակումբային մրցաշարերի մակարդակը և մատչելիությունը»,- ասել է Չեֆերինը:

Սիրարփի Աղաբաբյան