«Թող Վանեցյանն ասի՝ ընտրությունների ժամանակ իրենց ներքին խոհանոցում ինչ է եղել». Արմեն Աշոտյան
ՀՀԿ փոխնախագահ Արմեն Աշոտյանի խոսքով, եթե ԱԱԾ նախկին պետ Արթուր Վանեցյանը ցանկանում է քաղաքական դաշտում դիրքավորվել, իսկ նրա հայտարարությունն այդպիսին էր, ապա, շախմատի կանոններով՝ սկսել է՝ պետք է խաղա, սևո՞վ կխաղա, թե՞ սպիտակով, նրա ընտրությունն է, պետք է պատասխանի մի քանի հարցերի։
«Մինչև քաղաքական դաշտ մտնելը պետք է պատասխանի իմ կողմից բարձրաձայնած չորս հարցերին։ Որպես ՀՀ քաղաքացի և ոչ վերջին քաղաքական գործիչը՝ ուզում եմ, որ Վանեցյանը պատասխանի, թե ինչպե՞ս է գնահատում Փաշինյանի հոգեբանական վիճակը։ Ինչպե՞ս է գնահատում ՀՀ իշխանությունների քաղաքականությունն Արցախի հարցում, ինչպես նաև՝ Փաշինյանի քաղաքականությունը Ռուսաստանի հետ հարաբերությունների հարցում։
Արդյո՞ք Նիկոլ Փաշինյանն իրեն տվել է հանձնարարություն քաղաքական ընդդիմադիրներին հետապնդելու և այլ ապօրինի գործողություններ իրականացնելու համար։ Վանեցյանը նաև պետք է ասի, թե նախորդ տարվա դեկտեմբերին խորհրդարանական արտահերթ ընտրություններին ներքին խոհանոցում ինչեր են եղել»,- նշեց Արմեն Աշոտյանը։
Զվարթ Խաչատրյան
