Արդյոք մյուս բուհերի ռեկտորների դոկտորական ատենախոսությունները զերծ են գրագողությունից. Անի Սամսոնյանի նամակը նախարարին

ՀՀ ԱԺ պատգամավոր Անի Սամսոնյանը նամակ է հղել Գիտության ու կրթության նախարար Արայիկ Հարությունյանին, որում ասվում է.

Սույն թվականի օգոստոսի 22-ին Հայաստանի պետական տնտեսագիտական համալսարանի ռեկտորի պաշտոնակատար Ռուբեն Հայրապետյանը թողեց զբաղեցրած պաշտոնը դոկտորական ատենախոսության հետ կապված խնդիրների պատճառով։ Մասնավորապես՝ օգոստոսի 26-ին Բարձրագույն որակավորման կոմիտեն հրապարակեց Ռուբեն Հայրապետյանի դոկտորական ատենախոսության վերաբերյալ բողոքն ուսումնասիրող հանձնաժողովի եզրակացությունը, համաձայն որի «համեմատված հատվածների գերակշիռ մասում առկա են այլ հեղինակներից և աղբյուրներից փոխառված նյութեր՝ առանց համապատասխան հղումների»:

Ձեր՝ օգոստոսի 21-ին «Ֆեյսբուք» սոցիալական ցանցում արված հայտարարության մեջ նշված էր, որ՝ «Հաշվի առնելով այն, որ մեր կառավարության և անձամբ ինձ համար կրթական և գիտական համակարգում նման երևույթների բացառումն առաջնային նշանակություն ունի՝ եկանք փոխադարձ համաձայնության, որ ռեկտորի ժամանակավոր պաշտոնակատար Ռուբեն Հայրապետյանը կթողնի զբաղեցրած պաշտոնը»:

Պետք է նշեմ, որ հանրության շրջանում տարակուսանք է առաջացել, թե ինչու է ցուցաբերվում խտրական մոտեցում, երբ Բարձրագույն որակավորման կոմիտեն ձեռնամուխ է եղել ուսումնասիրելու միայն Հայաստանի պետական տնտեսագիտական համալսարանի ռեկտորի պաշտոնակատար Ռուբեն Հայրապետյան ատենախոսությունը։ Միևնույն ժամանակ հանրությունը ակնկալում է հավաստիանալ հետևալ հարցում՝ արդյոք մյուս բուհերի ռեկտորների դոկտորական ատենախոսությունները զերծ են գրագողությունից:

Հաշվի առնելով կրթական և գիտական համակարգում գրագողության նկատմամբ Ձեր ցուցաբերած լրջագույն վերաբերմունքը և հիմք ընդունելով «Ազգային ժողովի կանոնակարգ» Հայաստանի Հանրապետության սահմանադրական օրենքի 3-րդ հոդվածի, 1-ին մասի, 11-րդ կետը՝ առաջարկում եմ նախաձեռնել ՀՀ բոլոր բարձրագույն ուսումնական հաստատությունների ռեկտորների դոկտորական ատենախոսությունների ուսումնասիրությունը՝ բացառելով խտրական մոտեցումը։