«Վարչապետը տարբեր հրավերներ է ստանում, և ինքն է որոշում՝ որոնք ընդունել». Վլադիմիր Կարապետյան

Այսօր «Ժամանակ» թերթն անդրադարձել էր վարչապետ  Նիկոլ Փաշինյանի՝  Լեհաստան չմեկնելու պատճառներին, ըստ որի՝  Նիկոլ Փաշինյանի Լեհաստան չմեկնելու և այնտեղ սեպտեմբերի 3-5-ը կազմակերպվող տնտեսա­կան համաժողովին չմաս­նակցելու որոշումը որևէ կապ չունի ՌԴ նախագահ Վլադիմիր Պուտինի և Բելառուսի նախագահ Ալեքսանդր Լուկաշենկոյի Լեհաստան չմեկնելու որոշումների հետ:

Ըստ թերթի դիվանագիտական աղբյուրի՝ վարչապետ Նիկոլ Փաշինյանը ցանկացել է հանդիպում Լեհաստանի նա­խագահ Բրոնիսլավ Կոմարովսկու հետ, սակայն լեհական կողմը նպատակահարմար չի համարել նման հան­դիպման կազմակերպումը՝ նկատի ունենալով, որ փետր­վարին Լեհաստանում տեղի են ունենալու նախագահա­կան ընտրություններ, և հե­ռացող նախագահի հետ իմաստ չունի երկարաժամ­կետ օրակարգ քննարկելը:

«Հիշեցնենք, որ Բրոնիսլավ Կոմարովսկին նախապես հայտարարել էր, որ տարածաշրջանային այցի շրջանա­կում պետք է այցելի Հայաստան և Ադրբեջան, սակայն Հայաստան այցը չեղարկվել էր, ԼՀ նախագահն այցելեց միայն Ադրբեջան, որտեղ մեզ համար խիստ մտահոգիչ հայտարարություններ արեց: Չի բացառվում, որ վարչա­պետ Փաշինյանը մտադիր էր ԼՀ նախագահին հանդիպել՝ քննարկելու նաև Լեհաստա­նի դիրքորոշումը Արցախի հարցում»,- գրել էր թերթը:

Վարչապետի մամուլի խոսնակ Վլադիմիր Կարապետյանը 168.am-ի հետ զրույցում նշեց, որ թերթի տեղեկությունը հավաստի չէ. «Չի համապատասխանում իրականությանը: Վարչապետը տարբեր հրավերներ է ստանում, և ինքն է որոշում՝ որոնք ընդունել»:

Զարուհի Դիլանյան