«Ոստիկանությունը չի կարող իր գործողությունների իրավաչափության վերաբերյալ կարծիք հայտնել». Դանիել Իոաննիսյանը՝ ոստիկանության հայտարարության մասին
ՀՀ ոստիկանությունն այսօր հայտարարություն է տարածել օգոստոսի 19-ին Բաղրամյան պողոտայում Ամուլսարի շահագործման հետ կապված բողոքի ակցիայի ժամանակ ոստիկանության գործողության վերաբերյալ։
Հայտարարության մեջ նշված է, որ ոստիկանությունը ցուցարարների նկատմամբ կիրառել է համաչափ ֆիզիկական ուժ։
«Իրազեկ քաղաքացիների միավորում» հ/կ նախագահ Դանիել Իոաննիսյանը, սակայն, ոստիկանության այդ տեսակետը չի կիսում։
«Որոշ մարդիկ մարմնական վնասվածքներ են ստացել ոստիկանության գործողությունների արդյունքում, ինչը նշանակում է, որ պետք է հարուցվի քրեական գործ, և քրեական գործի սահմաններում ոչ թե ոստիկանությունը, այլ Հատուկ քննչական ծառայությունը պատասխան տա ոստիկանության գործողությունների իրավաչափության վերաբերյալ»,- 168.am-ի հետ զրույցում ասաց Դ. Իոաննիսյանը։
Նա ակնկալում է, որ կհարուցվի քրեական գործ, քանի որ ոստիկանությունը չի կարող իր գործողությունների իրավաչափության վերաբերյալ կարծիք հայտնել։
Զվարթ Խաչատրյան
