Ռուսական կողմն արձագանքել է Էրդողանի՝ Ղրիմի մասին արված հայտարարությանը
Ռուսաստանում քաղաքական գործիչները անդրադարձել են Թուրքիայի նախագահ Ռեջեփ Թայիփ Էրդողանի կողմից Ղրիմի մասին արված հայտարարությանը:
Այս մասին հայտնում է «ՌԻԱ նովոստի»-ն:
Ռուսաստանի խորհրդարանի Դաշնային խորհրդի Ղրիմից սենատոր Սերգեյ Ցեկովի կարծիքով, Անկարան չի առաջնորդվում իրողությունների ճշմարտացի ընկալմամբ:
«Ղրիմը կգոյատևի առանց Թուրքիայի կողմից ճանաչում ձեռք բերելու: Կարևորն այն է, որ Ռուսաստանը Ղրիմն ընդունում է որպես իր մի մասնիկը: Ղրիմի բնակչի համար դա է ամենակարևորը, իսկ մյուս երկրների կարծիքն այնքան էլ կարևոր չէ»,- նշել է նա:
Ցեկովը նաև ընդգծել է, որ Ռուսաստանն ու Թուրքիան միջազգային տարբեր խնդիրների վերաբերյալ ունեն հակասական մոտեցումներ, Ղրիմը նույնպես դրանց մեջ է:
Նրա գործընկերուհի Օլգա Կովիտիդին նշել է, որ Թուրքիան պետք է Ղրիմի հետ հարաբերությունների նոր մոդել կառուցի:
ՌԴ Պետդումայի պատգամավոր Նատալիա Պոկլոնսկայան հայտնել է, որ Էրդողանի նման դիրքորոշումը իր համար անակնկալ չէր:
«Հայտնի է, որ միայն անվախ և ուժեղ առաջնորդը կարող է ասել ճշմարտությունը և կայացնել այնպիսի որոշումներ, որոնցից կախված կլինեն աշխարհի հետագա զարգացումները»,- ավելացրել է նա:
Իսկ Ղրիմի թաթարների ազգային-մշակութային ինքնավարության ղեկավար Էյվազ Ումերովը հայտնել է, որ Էրդողանի հայտարարությունը հակասում է Ռուսաստանի և Թուրքիայի միջև ձևավորված բարեկամական հարաբերություններին և գործընկերությանը, ինչպես նաև անտեսում է թերակղզու բնակիչների ժողովրդավարական կամքը:
Թուրքիայի մայրաքաղաք Անկարայում օգոստոսի 7-ին տեղի է ունեցել Թուրքիայի նախագահ Ռեջեփ Թայիփ Էրդողանի և Ուկրաինայի նախագահ Վլադիմիր Զելենսկու համատեղ մամուլի ասուլիսը, որի ընթացքում Էրդողանը հայտարարել էր, որ Թուրքիան երբեք չի ընդունի Ղրիմի ապօրինի բռնակցումը:
2014 թվականի մարտին Ուկրաինայում անցկացված հանրաքվեի արդյունքում Ղրիմն անցել է Ռուսաստանի կազմի մեջ: Թերակղզու բնակիչների ավելի քան 95 տոկոսը կողմ է քվեարկել Ռուսաստանի հետ միավորմանը:
