Apple ընկերությունը զուտ շահույթի անկում է արձանագրել
Apple ընկերության զուտ շահույթը 2019 ֆինանսական տարվա երրորդ եռամսյակի արդյունքներով 13 տոկոսով նվազել էանցյալ տարվա ցուցանիշների համեմատությամբ: Համապատասխան տեղեկատվությունը ներկայացված է Քուփերթինոյի (Կալիֆոռնիայի նահանգ) ընկերության եռամսյակային հաշվետվության մեջ, որը հրապարակվել է հուլիսի 30-ին։
Տարածված տվյալների համաձայն, 2019 թվականի երրորդ եռամսյակում, որն ավարտվել է հունիսի 29-ին, Apple-ի շահույթը կազմել է 10,04 մլրդ դոլար այն դեպքում, երբ 2018 թվականի համապատասխան ժամանակաշրջանում այդ ցուցանիշը 11,5 մլրդ դոլար էր: Դրա հետ մեկտեղ ընկերության ընդհանուր հասույթը փոքր-ինչ ավելացել է՝ հասնելով 53,8 մլրդ դոլարի՝ մեկ տարի առաջվա 53,2 մլրդ դոլարի համեմատությամբ:
Ընթացիկ տարվա երկրորդ եռամսյակի արդյունքներով՝ ընկերության հասույթը կազմել էր 58 մլրդ դոլարից փոքր-ինչ ավելի, իսկ շահույթը՝ 11,5 մլրդ դոլար: Հաշվետվությունը պարունակում է նաեւ տվյալներ, որոնց համաձայն Apple-ը փոքր-ինչ զիջել է դիրքերը իր սարքերի վաճառքում՝ 2019 ֆինանսական տարվա վերջին երեք ամսվա ընթացքում վաստակելով 42,3 մլրդ դոլար այն դեպքում, երբ մեկ տարի առաջ տեխնիկայի վաճառքներն ընկերությանը բերել էր 43,09 մլրդ դոլար:
Սակայն իր պտուղները տվեց այն, որ Apple-ը շեշտը դրեց վճարովի ծառայությունների տրամադրման վրա. այս տարի օգտատերերը դրանց վրա ծախսել են 11,4 մլրդ դոլար այն դեպքում, երբ նախորդ տարվա երրորդ եռամսյակում այդ թիվը հավասարվել էր 10,1 մլրդ դոլարի, հաղորդել է ՏԱՍՍ-ը:
