«Պարոն Բեքմեզյան, եթե Ձեր ափից հոտ քաշելով՝ մասնակցում եք դատական նիստերին, ուրեմն՝ Ձեզ ասելու բան չունեմ». Տավարացյանը՝ Գրիգոր Բեքմեզյանին
Այսօր ԲԴԽ-ում տեղի ունեցավ Նախշուն Տավարացյանի հրաժարականի պահանջով նիստ. նման նախաձեռնությամբ էին հանդես եկել ԲԴԽ անդամներ Գրիգոր Բեքմեզյանը, Լիպարիտ Մելիքջանյանը և Հայկ Հովհաննիսյանը։
Նրանք իրենց պահանջը հիմնավորեցին նրանով, որ Նախշուն Տավարացյանը նախորդ տարի հրաժարվել է ստանձնել ԲԴԽ անդամի լիազորությունները, փոխարենը՝ օրեր առաջ նա երդվեց։
Գրիգոր Բեքմեզյանը նաև հայտարարեց, որ Նախշուն Տավարացյանը նախորդ մեկ տարվա ընթացքում չի ներկայացել ԲԴԽ նիստերին և տեղյակ չի եղել, թե ինչ է այդ նիստերին քննարկվում։
Ի պատասխան՝ Ն. Տավարացյանն ասաց, որ այն անձը, որն իր լիազորությունները չի ստանձնել երդմամբ, երբևէ չի կարող պատասխանատվության կանչվել՝ երդմամբ սահմանված պարտավորությունների չկատարման համար։
«Հարցը բաց է մնում, թե արդյոք ես օրենքի 82-րդ հոդվածի 4-րդ մասի իմաստով 2018 նոյեմբերի 8-ից համարվո՞ւմ եմ ԲԴԽ անդամ, թե՞ ոչ։ Ես չեմ համարվում խորհրդի անդամի պաշտոնը ստանձնած անձ, քանի որ խորհրդի օրինական անդամ հանդիսանում է օրենքով սահմանված գործընթացի վերջին փուլը՝ երդման գործընթացը կատարածը, որը չի կատարվել։ Ես համարվում եմ խորհրդի պաշտոնը ստանձնած իմ երդման օրվանից՝ սյուն թվականի հուլիսի 11-ից։ Ինչ վերաբերում է իմ կողմից ստանձնած վերջին փուլի ձախողմանը, ապա կարծում եմ՝ տեղի ունեցածին պետք է գնահատական տրվի դատավորի վարքագծի կանոնների շրջանակներում, այլ ոչ թե խորհրդի անդամի լիազորությունների շրջանակներում»,- ասաց Ն. Տավարացյանը։
Նա նաև Գրիգոր Բեքմեզյանին հիշեցրեց, որ որպես իրավաբան-գիտնական՝ շրջանցել է Դատական օրենսգրքի 91-րդ հոդվածի պահանջը և ամբողջ մեղքը բարդել իր վրա։
«Պարոն Բեքմեզյան, եթե դուք Ձեր ափից հոտ քաշելով՝ մասնակցում եք դատական նիստերին և գիտեք, որ այդ օրը Բարձրագույն դատական խորհրդի նիստ է լինելու, առանց ծանուցման, ուրեմն՝ Ձեզ ասելու բան չունեմ»,- շեշտեց Ն. Տավարացյանը և ընդգծեց, որ դատական խորհուրդը նիստ անցկացնելուց առաջ օրվա մասին նախապես ԲԴԽ անդամներին ծանուցումներ է ուղարկում, ինչն ինքը չի ստացել։
Նշենք, որ նիստն այսօր հետաձգվեց, ԲԴԽ անդամներն ասացին, որ հաջորդ նիստի օրվա մասին կտեղեկացնեն։
Զվարթ Խաչատրյան
