«Անկախ միտումնավոր տարբեր շահարկումներից՝ հայ-ռուսական ռազմաքաղաքական դաշինքը տարածաշրջանում որոշակի ստաբիլության գործոն է». թուրքագետ
Հուլիսի 12-ից Ռուսաստանը սկսել է խոշոր բեռնատար օդանավերով Թուրքիա փոխադրել Ս-400 տեսակի համակարգերը: Թուրքիայի նախագահ Ռեջեփ Թայիբ Էրդողանը հայտարարել է, որ շուրջ 100 թուրք մասնագետներ մեկնել են Ռուսաստան ռուսական ԶՀՀ Ս-400-ի հետ աշխատելու հնարավորություններն ուսումնասիրելու համար:
Տարբեր փորձագետների գնահատականներով՝ սրանք վկայում են ռուս-թուրքական խորացող հարաբերությունների մասին: Արդյո՞ք սա ռիսկային է Հայաստանի համար. 168.am-ը գնահատականներ լսեց թուրքագետ Ռուբեն Մելքոնյանից:
«Ընդհանրապես, մեր տարածաշրջանը բարձր ռիսկի կշիռ ունեցող տարածաշրջան է, բայց կոնկրետ ռուս-թուրքական հարաբերությունների վերջին ջերմացումը, չեմ կարծում, որ կարող ենք գնահատել՝ որպես կոնկրետ ռիսկ կամ սպառնալիք Հայաստանի նկատմամբ՝ երկու առումով. Առաջինը՝ Թուրքիան սպառնալիք հանդիսացող երկիր է, բայց միևնույն ժամանակ՝ հայ-ռուսական ռազմաքաղաքական համագործակցությունը տասնամյակներով արդեն զսպիչ ուժ է Թուրքիայի համար, և չեմ կարծում՝ Ս400-ների վաճառքը կարող է էականորեն փոխել Թուրքիայի վերաբերմունքը հայ-ռուսական ռազմաքաղաքական դաշինքի նկատմամբ:
Եվ երկրորդը, որ ՌԴ-ն, այնուամենայնիվ, այս տարածաշրջանում ուն իր շահերը, իր աշխարհաքաղաքական նպատակները, և այդ նպատակներում ամենևին էլ անկախատեսելի Թուրքիայի հզորացումը չի տեղավորվում, և, բնականաբար, Հայաստանը՝ որպես Ռուսաստանի կարևոր գործընկեր այս տարածաշրջանում, շարունակելու է պահպանել իր կարևորությունը»:
Ըստ թուրքագետի՝ անկախ քաղաքական վայրիվերումներից՝ հայ-ռուսական ռազմաքաղաքական փոխշահավետ դաշինքը շարունակելու է տարածաշրջանում մնալ՝ որպես ստաբիլության գործոն. «Անկախ հակառուսականության չափաբաժնի ավելացումից և միտումնավոր տարբեր շահարկումներից, հայ-ռուսական ռազմաքաղաքական դաշինքն ունի այս տարածշրջանում՝ ինչպես երկկողմ հայ-ռուսական փոխշահավետ նշանակություն, այնպես էլ՝ տարածաշրջանում որոշակի ստաբիլության գործոն է, քանի որ այս տարածաշրջանն անկանխատեսելի զարգացումների և սպառնալիք ներկայացնող պետությունների, տվյալ պարագայում՝ Թուրքիայի և Ադրբեջանի, շահերի հատման տիրույթում է»:
Զարուհի Դիլանյան
