Ժամանակը ցույց կտա՝ արդյոք նախագահի որոշումը պետականամետ քա՞յլ էր, թե՞ ոչ. Մակունց
Այսօր ԱԺ նիստում ՍԴ անդամի թեկնածու Վահե Գրիգորյանի թեկնածության քննարկման ժամանակ «Իմ քայլը» խմբակցության ղեկավար Լիլիթ Մակունցն իր ելույթում հայտարարեց, որ ժամանակն է դուրս գալ այն կարծրատիպից, որ քաղաքական որոշումը ենթադրում է կուսակցական որոշում:
«Քաղաքական որոշումն արժեքահեն որոշում է, դիրքորոշում և մոտեցում է, որը ցույց է տալիս, թե ինչ արժեքներով ենք մենք առաջնորդվում, ինչպիսի Հայաստան ենք ուզում ունենալ, ինչպիսի դատավորներ ենք ուզում ունենալ»,- ասաց Լ.Մակունցը:
Նա կարևորեց Վահե Գրիգորյանի քաղբանտարկյալների իրավունքները պաշտպանող անցյալը, որ նա չի կեղծում իր նախկին հայտարարությունները, չի գնում քծնանքի՝ հանուն ընտրվելու.
«Նաև այս հանգամանքն է ինձ հիմք տալիս մտածելու, որ թեկնածուն արժանի է հավակնել և ընտրվել Սահմանադրական դատարանի դատավոր»:
Լ.Մակունցը նշեց, որ իր համար հասկանալի է Վահե Գրիգորյանի և Արմեն Սարգսյանի դեմ սկսված խուճապային պայքարը, սակայն, ըստ նրա, ժամանակը ցույց կտա՝ արդյոք նախագահի որոշումը պետականամետ քա՞յլ էր, թե՞ ոչ:
Նրա կարծիքով՝ Գրիգորյանը լուրջ իրավական հետագիծ ունի և դա վստահություն է ներշնչում, որ ընտրվելուց հետո նա ավելացնելու է ՍԴ հանդեպ վստահությունը. «Եվ դիտարկում եմ Վահե Գրիոգրյանի թեկնածությունը արդարության վերականգնման համատեքստում»:
