«ՌԴ ԱԳՆ-ն չի կազմակերպել նրանց այցը Բաքու». Մարիա Զախարովան մեկնաբանել է Պետդումայի պատգամավորների մասնակցությունը հակահայկական երթին
Ռուսաստանի Դաշնության արտաքին գործերի նախարարության պաշտոնական ներկայացուցիչ Մարիա Զախարովան արձագանքել է Բաքվում հակահայկական միջոցառմանը ռուս պատգամավորների մասնակցությանը: Լրագրողների հետ ճեպազրույցում Մարիա Զախարովան նշել է, որ Ռուսաստանի ԱԳՆ-ն դրա հետ կապ չունի:
«Այնտեղ մասնակցել են ռուս պատգամավորներ: Կարծում եմ՝ արդարացի կլինի այդ հարցն ուղղել անմիջապես նրանց, թե ինչպես են իրենք ինքնուրույն կազմակերպել մասնակցությունը տվյալ միջոցառմանը: Մենք ասել ենք, որ Ռուսաստանի ԱԳՆ-ն այդ միջոցառմանը մասնակցության կազմակերպման հետ առնչություն չունի», – ասել է Զախարովան՝ պատասխանելով հայ լրագրողի հարցին, թե ով է եղել պատգամավորների՝ Բաքու մեկնելու և միջոցառմանը մասնակցելու կազմակերպիչը:
Բացի այդ, Մարիա Զախարովան վերահաստատել է Ռուսաստանի դիրքորոշումը ԼՂ հիմնախնդրի կարգավորման հարցում՝ նշելով, որ ՌԴ-ն շարունակելու է աշխատել հակամարտության խաղաղ կարգավորման ուղղությամբ:
«Ղարաբաղյան սարսափելի հակամարտությունը մահ և տառապանք է բերել բազմաթիվ անմեղ մարդկանց՝ և՛ ադրբեջանցիներին, և՛ հայերին: Եվ Ռուսաստանը մշտապես դա մեծ ողբերգություն է համարել: Մեր երկիրը զգալի ջանքեր է գործադրում այդ հակամարտության խաղաղ կարգավորման համար: Մենք այսուհետ ևս առաջնահերթ ուշադրություն կդարձնենք այդ հարցին տարածաշրջանում», – շեշտել է ՌԴ ԱԳՆ ներկայացուցիչը:
