«Կառավարության մեր գործընկերներն այնպես պետք է աշխատեն, որ տեսանելի լինի, ոչ թե կցկտուր». Միքայել Մելքումյան
Եվրասիական բանկը վերջին տարիներին ակտիվություն է ցուցաբերում նաև մասնավոր հատվածում և Հայաստանում գյուղոլորտի մի քանի նախագծեր են ֆինանսավորվել։ Այս մասին այսօր Ազգային ժողովի տարածաշրջանային և եվրասիական ինտեգրման հարցերի մշտական հանձնաժողովի նիստի ժամանակ հայտնեց ՀՀ փոխվարչապետ Մհեր Գրիգորյանի խորհրդական Հովհաննես Ազիզյանը՝ նկատելով, որ դա ուրախալի է։
Ըստ նրա՝ բանկը ֆինանսավորում է 20 մլն և ավելի դոլար արժեքով ծրագրերը, այժմ քննարկվում են փոքր ծավալով բիզնես ծրագրերի ֆինանսավորման հարցը, գրանտային ֆինանսավորման խնդիրը։
Հ.Ազիզյանը նշեց, որ Մհեր Գրիգորյանը բանկի խորհրդի անդամ է և որոշումներում անպայման մասնակցում է։
«Կառավարության մեր գործընկերներն այնպես պետք է աշխատեն, որ տեսանելի լինի, ոչ թե կցկտուր։ Հայաստանը փոքր երկիր է և բանկի 4-5%-ով մասնակցությունը կարող է շատ մեծ ազդեցություն ունենալ»,- ասաց հանձնաժողովի նախագահ Միքայել Մելքումյանը։
Նրա առաջարկով հանձնաժողովը որոշեց իրեն կից գիտափորձագիտական կենտրոն ձևավորել, որում կընդգրկվեն աջակցել ցանկացող մասնագետները։
