«Խաչատուրովի հարցը որոշվելու է ՀԱՊԿ անդամ պետությունների ղեկավարների մակարդակով». ՌԴ-ում ՀՀ դեսպան
ՌԴ-ում Հայաստանի Հանրապետության դեսպան Վարդան Տողանյանը «Էխո Մոսկվի» ռադիոկայանի եթերում անդրադարձել է Հավաքական անվտանգության պայմանագրի կազմակերպության (ՀԱՊԿ) գլխավոր քարտուղար Յուրի Խաչատուրովի դեմ հարուցված քրեական գործին, այդ պաշտոնից նրա հետկանչի գործընթացին:
Խոսելով «Մարտի 1»-ի գործով անցնող Խաչատուրովի շուրջ ստեղծված իրավիճակի մասին՝ Տողանյանը նշել է, որ Հայաստանում տեղի ունեցած հեղափոխությունից հետո մինչև վերջ չքննված գործերի քննությունը վերսկսվել է:
«Կոնկրետ հարցերով հարուցվել են քրեական գործեր, այդ թվում՝ նաև Խաչատուրովի դեմ: Բայց տվյալ պարագայում, կարծում եմ, ամբողջ համատեքստը կապ չունի ՀԱՊԿ-ին մեր անդամակցության հետ ու որևէ կերպ չի անդրադառնում այդ կազմակերպության աշխատանքի վրա: Պարոն Խաչատուրովը շարունակում է գլխավորել ՀԱՊԿ-ը: Մենք արդեն սկսել ենք այդ պաշտոնից նրա հետկանչի գործընթացը, այդ հարցը որոշվելու է անդամ պետությունների ղեկավարների մակարդակով»,-ասել է ՀՀ դեսպանը՝ ևս մեկ անգամ նշելով, որ պաշտոնական Երևանը տվել է համապատասխան գործընթացի մեկնարկը:
Լրագրողի այն հարցադրմանը, թե արդյոք ստեղծված իրավիճակը լարվածություն չի առաջացնում Մոսկվայի ու Երևանի հարաբերություններում, թե դա պարզապես աշխատանքային պահ է, դեսպանն ընտրել է պատասխանի երկրորդ տարբերակը:
