«Հայտարարում եմ, որ ԱԺ ընտրությունները տեղի կունենան նոյեմբերի վերջին կամ դեկտեմբերի սկզբին». Փաշինյան
Վարչապետ Նիկոլ Փաշինյանի կարծիքով արտահերթ ընտրությունները պետք է տեղի ունենան, որովհետև այս Խորհրդարանը չի ներկայացնում հայ ժողովրդին, որովհետև այն ընտրվել է համատարած ընտրակաշառքների, ճնշումների, հետապնդումների, վարչական լծակների օգնությամբ, և այս արտահերթ ընտրությունները պետք է խորհրդանշեն հայ ժողովրդի վերջնական հաղթանակը:
«Հայաստանի Հանրապետությունում այլևս չկա ընտրակաշառք վերցնող քաղաքացի»,-հավելեց նա:
Արտահերթ ընտրություններ պետք է տեղի ունենան նաև այն պատճաով, որ այս ԱԺ-ն մերժված է հայ ժողովրդի կողմից, և պետք է ձևավորվի Խորհրդարան, որը կարտահայտի հայ ժողովրդի կամքը, որը եղել է մայիսին տեղի ունեցած հեղափոխության պայմաններից մեկը, ինչն ամրագրվել է այս Խորհրդարանի կողմից ընդունված Կառավարության ծրագրում:
Նա շեշտեց, որ այդ ծրագրում գրված չի եղել, որ ընտրությունները կանցկացվեն մեկ տարի հետո, այլ գրված է մեկ տարվա ընթացքում, և այժմ հայտարարում եմ, որ այդ ընտրությունները տեղի կունենան նոյեմբերի վերջին կամ դեկտեմբերի սկզբին:
Երևանի ավագանու ընտրություններն էլ, ըստ Նիկոլ Փաշինյանի, փաստեցին, որ Աժ արտահերթ ընտրությունները պետք է տեղի ունենան անհետաձգելիորեն:
