ՀՀ ՏԿԶ նախարարությունն ու Շիրակի մարզպետարանը ներկայացնելու են անօթևանության խնդրի լուծման ծրագիր
Գյումրիում անօթևանության խնդրի լուծման համար պետք է քաղաքականության փոփոխություն կատարել և հստակ ժամկետներ սահմանել: Այս մասին սեպտեմբերի 19-ին Գյումրիում լրագրողների հետ ունեցած հանդիպման ժամանակ նշեց ՀՀ փոխվարչապետ Տիգրան Ավինյանը:
«Եթե մեխանիզմի փոփոխություն չիրականացնենք, ապա մինչև 2050 թվականը կունենանք անօթևաններ: Այն տեղեկատվությունը որ կա, ասում է, որ արդեն իսկ պետք է անօթևանության խնդիրը լուծված լիներ, բայց փաստացի դեռևս ունենք տնակներ: Սա նշանակում է, որ նախկինում, այն քաղաքականությունը, որ վարվել է այս ոլորտում, սխալ է եղել, և խնդիրը մնացել է: Մենք հեղափոխության կետից հետո կարձանագրենք՝ ինչ ունենք, և հստակ ժամկետներ կդնենք մեր առաջ և կլուծենք այդ անօթևան մնացած ընտանիքների հարցը, որ այլևս Շիրակում նման խնդիր չունենանք: ՀՀ տարածքային կառավարման և զարգացման նախարարությունը և Շիրակի մարզպետն ինտենսիվ աշխատում են, որպեսզի հարցի լուծման համար ծրագիր ներկայացնեն»,- նշեց Տիգրան Ավինյանը:
Արմենուհի Մխոյան
