Իսպանական ոստիկանությունը ձերբակալել է վրացական կազմակերպված հանցավոր խմբավորման 15 անդամների
Իսպանական ոստիկանությունը հատուկ գործողության ընթացքում ձերբակալել է վրացական կազմակերպված հանցավոր խմբավորման 15 անդամների, որոնք մեղադրվում են Բարսելոնայում ու նրա արվարձաններում բնակարանների ու տների կողոպուտների մեջ:
Այդ մասին հայտնել է Rustavi2 հեռուստաընկերությունը՝ հղում անելով տեղական ԶԼՄ-ներին: Ձերբակալվածների խուզարկության ընթացքում ոստիկանությունն առգրավել է 130 հազար եվրո, 2 կիլոգրամ ոսկյա զարդեր, էլեկտրատեխնիկա, ինչպես նաեւ բնակարանների կողոպտման համար նախատեսված սարքեր:
Ձերբակալվածների թվում է հանցախմբի 53-ամյա պարագլուխը: Նա, հետաքննության տվյալներով՝ ղեկավարում էր կազմակերպված հանցավոր խմբի գործունեությունը Բարսելոնայում, Ալիկանտում եւ Սեւիլիայում: Կատալոնիայի ոստիկանության տվյալներով՝ գերատեսչությունը որոնում է այդ հանցավոր խմբավորման եւս 10 անդամների:
Ոստիկանությունում նշել են, որ սեպտեմբեր ամսին կասեցրել են երկու խմբավորումների գործունեությունը, ինչը 50 տոկոսով նվազեցրել է գողությունների թիվը տարածաշրջանում:
