Մյանմայում ճեղքված ամբարտակի ջուրը հեղեղել է Սվա քաղաքը
Մյանմայի կենտրոնական մասում գտնվող ջրամբարի ջուրը ճեղքել է ամբարտակը եւ հեղեղել մերձակա քաղաքը՝ Սվա շրջկենտրոնը, ինչպես նաեւ երկրի գլխավոր ավտոմայրուղու մեծ մասը, որը Մյանմայի մայրաքաղաք Նեյպիեդոն կապում է Յանգոն եւ Մանդալայ խոշոր քաղաքների հետ: Այդ մասին օգոստոսի 29-ին Facebook-ում հայտնել է Մյանմայի հրշեջ ծառայության դեպարտամենտը, որը երկրի արտակարգ իրավիճակների գծով հիմնական գործակալությունն է:
Աղետի ստույգ մասշտաբներն առայժմ հայտնի չեն, տուժածների վերաբերյալ տվյալներ չկան: Հրշեջ ծառայության դեպարտամենտի ստորաբաժանումները որոնողա-փրկարարական գործողություններ են սկսել: Յանգոն-Նեյպիեդո-Մանդալայ ճանապարհով ավտոմեքենաների երթեւեկությունը փակված է ողողված տեղամասի երկու ուղղությամբ, հաղորդել է ՌԻԱ Նովոստին:
