Իրանի նախագահը կոչ է արել զինվորականներին պատրաստ լինել պայքարելու թշնամական տերությունների դեմ
Իրանի նախագահ Հասան Ռոուհանին օգոստոսի 21-ին հայտարարել է պաշտպանական հզոր ներուժ ունենալու անհրաժեշտության մասին՝ խուսափելու համար թշնամական պետությունների կողմից ոչնչացվելուց: Այդ մասին հայտնել է IRIB հեռուստառադիոհաղորդումների իրանական կորպորացիան:
«Մենք պետք է պատրաստ լինենք՝ մարտնչելու այն տերությունների դեմ, որոնք հավակնում են մեր տարածքին ու ռեսուրսներին,- ասել է Ռոուհանին՝ ելույթ ունենալով Իրանի պաշտպանական արդյունաբերության օրվան նվիրված արարողության ժամանակ: -Եթե մենք ուժեղ չլինենք, մեզ կոչնչացնեն»:
Նախագահը հավելել է, որ «Իրանը երբեք ագրեսիա չի դրսեւորել այլ պետությունների նկատմամբ»: «Դրա հետ մեկտեղ մեր երկիրը բացառիկ պաշտպանական ներուժ ունի»,-հավաստիացրել է նա, հաղորդել է ՏԱՍՍ-ը:
