Նիկոլ Փաշինյանը՝ ռուս պրանկերների մասին
«Իհարկե, բացի հումորից, ես դրանում տեսնում եմ նաև որոշակի քաղաքական բովանդակություն՝ այդ զանգերի միջոցով խոսակցության հեղինակները փորձում են ճշտել, թե ինչքանով է Եվրամիությունն աջակցել հեղափոխությանը Հայաստանում»,- այսօր լրագրողների հետ հանդիպման ժամանակ հայտարարեց ՀՀ վարչապետ Նիկոլ Փաշինյանը՝ անդրադառնալով ռուս պրանկերներին, որոնք արդեն մի քանի անգամ զանգահարել են եվրոպական երկրների, Եվրամիության բարձրաստիճան պաշտոնյաների և խոսել Նիկոլ Փաշինյանի անունից:
Նա նշեց, որ այդ հեռախոսազրույցների վերաբերյալ եվրոպական կողմից տարածված տեղեկատվությանն ի պատասխան՝ խնդրել է ՀՀ դիվանագիտական ներկայացուցչություններին տեղյակ պահել, որ ինքը ԵՄ պաշտոնյաների հետ հեռախոսազրույց չի ունեցել, սակայն գործընկերներն այնքան էլ լուրջ չեն վերաբերվել այդ տեղեկատվությանը՝ կարծելով, թե հին ու նոր իշխանությունների տեղեկացվածության խնդիր կա։
«Ես հույս ունեմ` ճշտել-վերջացրել են»,- հավելել է Ն.Փաշինյանը:
