ՔՊ-ական նախարարը 12 միլիոնից ավելի փոխառություններ ունի. «Փաստ»

«Փաստ» օրաթերթը գրում է. «Մայիսի 11-ին ՀՀ տարածքային կառավարման եւ զարգացման նախարար նշանակված Սուրեն Պապիկյանը Բարձրաստիճան պաշտոնատար անձանց էթիկայի հանձնաժողովին է ներկայացրել իր՝ 2018 թ. պաշտոնը ստանձնելու հայտարարագիրը:

Սուրեն Պապիկյանը հայտարարագրել է մեկ հողամաս ու «NISSAN TEANA 2.3» մակնիշի ավտոմեքենա: Պաշտոնը ստանձնելու օրվա դրությամբ ունեցել է փոխառություններ, որոնք կազմել են 12 միլիոն 726 հազար դրամ:

Դրամական միջոցները մայիսի 11-ի դրությամբ կազմել են 1 միլիոն 300 հազար դրամ ու 1400 ամերիկյան դոլար, իսկ եկամուտները՝ 1 միլիոն 801 հազար դրամ, որը երեք տարբեր աշխատավարձերի հանրագումար է:

Սուրեն Պապիկյանը «Քաղաքացիական պայմանագիր» կուսակցության անդամ է, մասնագիտությամբ պատմաբան է: 2009-2011 թթ. գլխավորել է ԵՊՀ պատմության ֆակուլտետի ուսանողական գիտական ընկերությունը: 2010-2016 թթ. իբրեւ պատմության ուսուցիչ աշխատել է Երեւանի թիվ 54 ավագ դպրոցում, 2011 թ.՝ «Քվանտ» վարժարանում: 2012-2016 թթ. սովորել է Սանկտ Պետերբուրգի պետական համալսարանի ասպիրանտուրայում»:

Ամբողջությամբ կարող եք կարդալ «Փաստ» օրաթերթի այսօրվա համարում: