Հայրապետի հրաժարականն այս կարգով չի լինում. Եզրաս արքեպիսկոպոսն անդրադարձել է կաթողիկոսի հրաժարականի պահանջով ցույցերին
Ռուսաստանի և Նոր Նախիջևանի հայոց թեմի առաջնորդ Եզրաս արքեպիսկոպոս Ներսիսյանը խոսել է Ն.Ս.Օ.Տ.Տ. Գարեգին Բ Ամենայն Հայոց կաթողիկոսի հրաժարականի պահանջով վերջին օրերին կազմակերպված բողոքի ակցիաներից: Ինչպես Մոսկվայից հաղորդում է «Արմենպրես»-ի թղթակիցը, Եզրաս արքեպիսկոպոս Ներսիսյանը հայտարարեց, որ նորմալ է վերաբերում բողոքի ակցիաներին: «Դա նորմալ դրսևորում է, բայց արտահայտման ձևն անընդունելի է»,- նկատեց նա:
Հարցին, թե պե՞տք է կաթողիկոսը հրաժարական տա՝ սրբազանը նշեց, որ Հայրապետի հրաժարականն այս կարգով չի լինում:
Լրագրողի ճշտող հարցին՝ ամեն դեպքում ժողովրդի պահանջն արդա՞ր է, մանավանդ, որ նրա հետ կապված դժգոհություններ կան, Եզրաս արքեպիսկոպոս Ներսիսյանը, ով Վեհափառ Հայրապետի հարազատ եղբայրն է, ասաց. «Հայոց հայրապետը ծառայում է ժողովրդին: Եկեղեցու առաքելությունը կոչված է դրան՝ ծառայել ազգային շահին և զորակցել Հայոց պետականությանը»:
Հունիսի 6-ին Սուրբ Կաթողիկե և Սուրբ Աննա եկեղեցու բակում մի խումբ քաղաքացիներ, այդ թվում՝ քահանաներ բողոքի ակցիա էին անցկացրել, որի ընթացքում պահանջել էին Գարեգին Բ Ամենայն Հայոց Կաթողիկոսի հրաժարականը: Ցույցի մասնակիցներին հունիսի 7-ին կաթողիկոսը հրավիրել էր Մայր Աթոռ Սուրբ Էջմիածին, որտեղ Գարեգին Բ Սրբազանի հրաժարականը պահանջող քաղաքացիները ներկայացրել էին իրենց տեսակետները:
Աննա Գզիրյան
