Լուսնային ճամփորդությունների տիեզերանավն ամռանը փորձարկումների կպատրաստեն ԱՄՆ-ում
SpaceX կորպորացիայի բազմակի օգտագործման առաջին մաքոքը, որն առաջիկա տարիներին պետք է տուրիստական ճամփորդություններ կատարի Լուսնի շուրջը, արդեն հուլիսին անօդաչու փորձարկումների կպատրաստեն ԱՄՆ-ի Քանավերալի հրվանդանում: Այդ մասին «Ինտերֆաքս»-ին հայտնել է հրթիռատիեզերական ճյուղի մի աղբյուր:
«Dragon V2 տիեզերանավը Քանավերալի հրվանդան կժամանի հուլիսի կեսերին: Այնտեղ կսկսվի նախապատրաստումը դրա առաջին անօդաչու փորձարկումներին, որոնք պլանավորված են օգոստոսին: Սակայն արձակման նախապատրաստումը ժամանակ է պահանջում, եւ բոլոր աշխատանքները մինչեւ օգոստոս կարող է ավարտված չլինեն: Այդ դեպքում անօդաչու թռիչքը, հնարավոր է, հետաձգեն դեկտեմբերին»,- ասել է աղբյուրը:
