«Կապիտալն իմաստ չունի երկրից դուրս բերել. աշխարհն այնպիսին է, որ չեք կարող թաքնվել». Ատոմ Մարգարյան
«Կապիտալն իմաստ չունի երկրից դուրս բերել, որովհետև այսօր աշխարհն ընդհանրապես այնպիսին է, որ չեք կարող թաքնվել։ Նախորդ տարի, երբ ՌԴ-ում սկսեցին ուժեղանալ պատժամիջոցները, օլիգարխները խնդրեցին, որ կառավարությունը գործիքներ ստեղծի, որ երկրից անօրինական դուրս բերված կապիտալը հնարավոր լինի լեգալացնել և վերադարձնել երկիր»,- այսօրվա ասուլիսին ասաց տնտեսական գիտությունների թեկնածու, դոցենտ Ատոմ Մարգարյանը։
Կապիտալը վերադարձնելու գործիքներից մեկը, որն առկա է Հայաստանում, ըստ նրա՝ երկրի արժութային պետական պարտատոմսերն են.
«Մարդիկ, ովքեր օֆշորներում գումարներ ունեն, պարզապես պետք է շահավետ պայմաններով պարտատոմսեր գնեն, իսկ մեր պարտատոմսերի եկամտաբերությունը գրավիչ է։ Այսինքն՝ կապիտալի համաներման հետ միասին՝ պետք է գնալ այնպիսի գործիքների ստեղծման, որ կապիտալի սեփականատերերը չվախենան լեգալ, արդար մրցակցային միջավայրում աշխատելու և կապիտալը երկրին ծառայեցնելու համար»։
Բիզնեսի մարդիկ, տնտեսագետի խոսքով՝ պետք է հասկանան, որ հարկերը պետք է վճարել. «Դրանից կախված է հարկային բեռի իջեցման հնարավորությունը»։
Լրագրողները հետաքրքրվեցին, թե ինչի՞ արդյունքն էր այն, որ այս օրերին հայկական դրամը տատանումների չենթարկվեց։ «Քաղաքական պրոցեսները, եթե խաղաղ են ընթանում, եթե ազդակները շուկաներին դրական են, եթե երկրի պահուստները բավարար են, դրանք կայուն պահելու տատանողական միջավայրից դուրս փոփոխություններ, անկումներ թույլ չտալու հնարավորություններ կան, բոլոր այդ գործոններն աշխատել են։
Մեր տնտեսական սիստեմն ունի կայունության պաշար, և սա, թերևս, նաև Կարեն Կարապետյանի կաբինետի ձեռքբերումն է»,- պարզաբանեց տնտեսագետը։
