ԱՄՆ-ում պատրաստվում են ֆիլմ նկարահանել Թրամփի՝ իշխանության գալու մասին. THR
ԱՄՆ-ի նախագահ Դոնալդ Թրամփի՝ իշխանության գալու պատմությունը պատրաստվում են դնել նոր կինոժապավենի հիմքում: Այդ մասին մայիսի 2-ին հայտնել է The Hollywood Reporter հանդեսը: Նրա տվյալներով՝ կինոնկարը կունենա «Աշակերտը» անվանումը (այս անվանումն է կրում ժողովրդականություն վայելող այն հեռուստաշոուն, որի հաղորդավարը եղել է Թրամփը):
Ֆիլմի սցենարի վրա աշխատելու է Vanity Fair հանդեսի հատուկ թղթակից Գեբրիել Շերմանը: «Լինելով լրագրող՝ ես ավելի քան 15 տարի գրել եմ Դոնալդ Թրամփի մասին,-հրատարակությունը մեջբերում է Շերմանի խոսքը:
Նա նշել է, որ արդեն «երկար ժամանակ հիանում է» Միացյալ Նահանգների ներկայիս ղեկավարի պատմությամբ: Ինչպես գրում է Vanity Fair-ը, Թրամփի պատմությունը ներկայացվելու է այն մարդկանց դիտակետից, որոնք ազդեցություն են գործել ապագա նախագահի վրա, այդ թվում՝ նրա իրավաբանի՝ Ռոյ Քոնի տեսանկյունից: Կինոնկարի պրոդյուսերը լինելու է Gidden Media ընկերությունը: Նկարահանումների սկսվելու ժամանակը չի նշվում, հաղորդել է ՏԱՍՍ-ը:
