Լապշինը Վիեննայում հանդիպել է ԵԱՀԿ մամուլի ազատության հարցերով ներկայացուցիչ Դեզիրի հետ
Հայտնի բլոգեր Ալեքսանդր Լապշինը Վիեննայում հանդիպումներ է ունեցել ԵԱՀԿ մամուլի ազատության հարցերով ներկայացուցիչ Արլեմ Դեզիրի և նրա գրասենյակի տնօրեն Ֆրան Մարոևիչի հետ: Հանդիպումներում նա ներկայացրել է Ադրբեջանի կողմից իր նկատմամբ ցուցաբերված հանցավոր վերաբերմունքը: Այս մասին նա գրառում է կատարել ֆեյսբուքյան իր էջում:
«Այս մարդիկ ինձ շատ են օգնել դժվար ժամանակ»,- նշել է Լապշինը:
Ավելի վաղ նա հայտարարել էր, որ 2018-ը հռչակում է Ադրբեջանին պատժելու տարի: Լապշինը հայտնել էր, որ պատրաստվում է ողջ աշխարհին պատմել Ադրբեջանում իր հետ տեղի ունեցածի մասին: «Ինձ անընդհատ հարցնում են, թե ինչու եմ կպել Ադրբեջանին և որն է իմ վերջնական նպատակը: Շատ պարզ: Նպատակը նրանց իրենց հանցագործությունների համար ոսկե շեկելով (Իսրայելի փողը- խմբ.) պատժելն է. դա մեկ: Երկրորդ հերթին ցանկանում եմ աշխարհին տեղեկացնել այն մասին, թե ինչ է անում Բաքվի ռեժիմը՝ ոչ միայն ինձ հետ կատարվածը, այլ այն, ինչ նա անում է իր քաղաքացիների հետ»,- ասել էր Լապշինը՝ հավելելով, որ կջնջի «այդ կասպիական երկիրն աշխարհի իմ քարտեզից»:
Ռուսաստանի, Իսրայելի և Ուկրաինայի քաղաքացի Լապշինը ձերբակալվել էր 2016 թվականին Բելառուսում՝ Ադրբեջանի հարցման համաձայն: Պաշտոնական Բաքուն բլոգերին «սև ցուցակ»-ի մեջ էր ներառել առանց իրենց հետ համաձայնեցնելու Լեռնային Ղարաբաղի Հանրապետություն այցելելու պատճառով:
Բելառուսի Գերագույն դատարանը 2017 թվականի փետրվարի 7-ին մերժել էր Լապշինի բողոքը՝ կապված Բելառուսի Գլխավոր դատախազության որոշման հետ, որով Լապշինը պետք է արտահանձնվեր Ադրբեջան: Լապշինը նույն օրը հատուկ չվերթով տեղափոխվել էր Մինսկից Բաքու ` պետական անվտանգության ծառայության աշխատակիցների ուղեկցությամբ:
Ծանր հանցագործությունները քննող Բաքվի դատարանում հուլիսի 20-ին հրապարակվել էր ՌԴ և Իսրայելի քաղաքացի բլոգեր Ալեքսանդր Լապշինի գործով դատավճիռ. նա դատապարտվել էր 3 տարվա ազատազրկման:
2017 թվականի սեպտեմբերի 11-ին Իլհամ Ալիևը ներում շնորհեց Լապշինին:
